Абаронцы гродзенскіх дрэваў атрымалі позвы ў суд
Грамадскія актывісты Гродна, абаронцы дрэваў, атрымалі позвы ў суд, які адбудзецца 13 лістапада. Спроба перашкодзіць супрацоўнікам зялянгаса знішчаць зялёныя насаджэнні 16 кастрычніка бягучага года скончылася складаннем пратакола, паводле якога міліцыянты абвінавачваюць трох жыхароў горада ў здзяйсненні дробнага хуліганства і непадпарадкаванні законным патрабаванням.
Падчас добраўпарадкавання горада на завулку Тэлеграфным краязнаўца Ігар Лапеха, моладзевая актывістка Надзея Крапівіна і сябра руха “За свабоду” Эдвард Дмухоўскі сталі на абарону дрэваў, якія паводле пастановы гарвыканкама падлягалі зліквідаванню. Свае захады гарадзенцы абгрунтавалі незаконнымі дзеяннямі мясцовых уладаў: зліквідаванне дрэваў ажыццяўлялася ў сувязі з тым, што лісце забівала стокі вады на даху будынка, у якім знаходзіцца каледж жыллёва-камунальнай гаспадаркі.
На думку Ігара Лапехі, радыкальныя дзеянні па абароне дрэваў выкліканыя ў першую чаргу абыякавасьцю мясцовых уладаў, якія не звяртаюць увагі на грамадскую думку.
Між тым, пазазаконныя дзеянні мясцовых уладаў па знішчэнні дрэваў у Гродна - факт, які падцвердзіў камітэт прыродных рэсурсаў.Камунальныя службы горада атрымалі прадпісанне, згодна з якім іх дзеянні па знішчэнню дрэваў з’яўляюцца парушэннем прыродаахоўнага заканадаўства, паводле якога выдаленне аб’ектаў расліннага свету абавязкова ўзгадняецца з насельніцтвам.
