Міколу Аўтуховічу не дазволілі працаваць кіроўцам таксоўкі
Мікола Аўтуховіч працуе кіроўцам у сябе дома ў Ваўкавыску. Ён знаходзіцца пад наглядам міліцыі, а тэрмін прысуду скончыцца толькі ўлетку наступнага году. Раней у яго было больш за дваццаць таксовак, але калі Аўтуховіч не захацеў ствараць таксафірму, суд палічыў гэта парушэньнем — ухіленьнем ад сплаты падаткаў.
Мікалая Аўтуховіча рэгулярна правяраюць міліцыянты, а працуе ён у фірме “Ніка-таксі 22222”. У ёй трынаццаць машын. Таксоўкі, якія належалі самому Аўтуховічу, сканфіскавалі, але частку машын пакінулі ягонай жонцы Алене.
“Я лічуся проста кіроўцам. Кіроўцам таксоўкі мне не дазволілі працаваць, бо ў мяне рэжым, я пасьля дзевятнаццатай гадзіны павінен быць дома. Мне не дазваляюць выяжджаць за тэрыторыю Ваўкавыска ні па працы, ніяк. У выходныя дні мне ўвогуле не дазваляюць выходзіць з дому: у суботу і ў нядзелю, і ў сьвяточныя дні”, - сказаў Мікола Аўтуховіч у інтэрв’ю “Радыё Свабода”.
У мінулым траўні Мікалай Аўтуховіч разьлічваў на зьмену пакараньня — на гэтак званае “ўмоўна-датэрміновае вызваленьне”. Але на яго склалі пратакол нібыта за дробнае хуліганства. І хаця суд палічыў выпадак нязначным, дакумэнты на датэрміновае вызваленьне Аўтуховіча складзенымі не былі.
Палітвязьню Міколу Аўтуховічу, якому зьняволеньне замянілі на абмежаваньне свабоды па месцы жыхарства, не дазволілі працаваць кіроўцам таксоўкі.
Пакуль Аўтуховіч быў у турме, а яго машыны — пад арыштам, у Ваўкавыску зьявіліся новыя таксоўкі, іх стала больш. Аўтуховіч падбаў пра ўзровень сэрвісу, цяпер яго ўсе прытрымліваюцца, кажуць у горадзе.
“За той час, як ён змагаўся, падняліся новыя фірмы. Трэба аддаць яму належнае, што ён нейк ускалыхнуў усё. Без Аўтуховіча не было б гэтых іншых фірмаў. У яго была пастаўлена справа, усё арганізавана, дыспэтчарская служба добра працавала”, - пацьвярджае адзін з жыхароў Ваўкавыску.
Дачка Міколы Аўтуховіча Кацярына скончыла сёлета школу, агульны бал атэстату — амаль дзясятка. Аднак трапіць у рамках праграмы Каліноўскага на навуку ў Польшчу яна не змагла.
“Пракінулі яе па праграме Каліноўскага. Прайшла тэсты, зьезьдзіла ў консульства, гутарку прайшла. А потым сказалі: вам няма васямнаццаці гадоў”, - тлумачыць Мікола Аўтуховіч.
Паступаць вучыцца ў беларускія вну было ўжо запозна, і сёньня Кацярына дома.
“Цяпер я хачу адправіць яе ў Польшчу на падрыхтоўчы курс, на “нулёўку”. Зраблю ўсё магчымае, візу зрабілі, цягам месяца ўсё вырашыцца. Але цяжка, куды ні стукаесься, паўсюль зачынена”, - зазначае бацька дзяўчыны.
Мікалу Аўтуховіча пасадзілі ў 2006 годзе на тры з паловай гады, абвінаваціўшы ў нясплаце падаткаў у асабліва буйным памеры і ў ажыцьцяўленьні прадпрымальніцкай дзейнасьці без рэгістрацыі, без атрыманьня ліцэнзіі. За кратамі прадпрымальнік прабыў крыху больш за два гады. Падчас сьледзтва, а затым і суду ён праводзіў галадоўкі пратэсту. Спачатку, пакуль ішло сьледзтва, ён дамогся, каб яго перавялі зь сьледчага ізалятара пад хатні арышт у Ваўкавыск. Але напярэдадні суду ён уцёк і быў затрыманым праз два месяцы ў Менску, дзе хаваўся.
