Віцебск: Выніковыя пратаколы ўчастковых камісій спачатку патрапяць у кабінеты кіраўнікоў выканкама
Акруговая камісія па Віцебскай-Чкалаўскай выбарчай акрузе №18 да сённяшняга дня размяшчалася ў школе №45. 28 верасня, пасля абеду, без тлумачэння прычын, без паведамлення ў сродках масавай інфармацыі (у абласных і гарадскіх газетах пра перадыслакацыю камісіі не гаварылася) акруговай камісіі на звыклым месцы ўжо не было. Знайшлася яна за межамі выбарчай акругі ў будынку адміністрацыі Першамайскага раёна г.Віцебску.
Мэта пераезду -- змяніць шлях старшыняў участковых камісій з пратаколамі галасавання. Зараз яны будуць патрапляць у акруговую камісію праз кабінет кіраўніка адміністрацыі або галоўнага раённага ідэолага.
Аналагічна забралі пад крылца і акруговую камісію па Віцебскай-Горкаўскай акрузе №17. Забралі з будынка, размешчанага ў ста метрах ад раённай адміністрацыі. Мэта тая жа: змяніць маршрут вынікаў галасавання -- накіраваць у акруговыя камісіі пратаколы галасавання праз кабінеты кіраўнікоў адміністрацыі Першамайскага раёна.
"Праваабаронцы за свабодныя выбары"
