Пакараныя ўдзельнікі Гарадзенскай акцыі з нагоды шостых угодкаў зьнікненьня Юры Захаранкі абскарджваюць вынесеныя прысуды
26 траўня 2005 году адзін з актывістаў “Ланцуга неабыякавых людзей”, які адбыўся ў Гародні 7 траўня, Юры Істомін падаў скаргу на вырак Кастрычніцкага раённага суда Гародні ў Гарадзенскі абласны суд. Па словах спадара Істоміна рашэньне суда было не юрыдычным, а палітычным: “Яшчэ на першым паседжаньні мы падалі хадайніцтва, каб да справы былі дададзены пастановы Вярхоўнага суда Рэспублікі Беларусь, падпісаныя яго старшынём Сукалам і цяперашнім Генеральным пракурорам краіны Міклашэвічам, паводле якіх знаходжаньне людзей на вуліцы з партрэтамі зьніклых палітыкаў не кваліфікуецца як пікетаваньне”. У разе адмоўнага рашэньня Гарадзенскага абласнога суда, актывісты акцыі мяркуюць скардзіцца ў Вярхоўны суд краіны. Таксама Юры Істомін склаў скаргі ў Гарадзенскае абласное УУС, пракуратуру Кастрычніцкага раёну Гародні і Гарадзенскі гарадзкі савет дэпутатаў на дзеяньні падпалкоўніка крымінальнай міліцыі Кастрычніцкага РАУС Г. Зайку на прадмет незаконных дзеяньняў супрацоўнікаў міліцыі. Адной з мэтаў сваіх скаргаў актывісты прайшоўшай акцыі лічаць далейшае прыцягваньне увагі грамадзтва на справы па зьнікненьню палітыкаў.
