Жлобін: Адмоўся ад сабраных подпісаў!
Сябру ініцыятыўнай групы Валерыя Рыбчанка на працы прымусілі ў пісьмовай форме адмовіцца ад сабраных подпісаў.
15 жніўня Аляксандр Нябераў, працаўнік цэха кантрольна-вымяральных прыбораў БМЗ, быў выкліканы на гутарку да непасрэднага начальніка А. Камісарчыка. Камісарчык, спаслаўшыся на кіроўцу заводу Віктара Матачкіна, прапанаваў Аляксандру напісаць заяву па ўзоры: "Я, прозвішча, імя, імя па бацьку, заяўляю аб выхадзе са складу ініцыятыўнай групы Валерыя Рыбчанкі. Сабраныя мною подпісы прашу лічыць несапраўднымі". А. Нябераў перадаў гэтую заяву ў рукі свайго начальніка. 14 жніўня ў Жлобінскім райвыканкаме Аляксандр верыў каля 50 подпісаў.
Каментуючы сітуацыю, Валерый Рыбчанка, прэтэндэнт на дэпутацкі мандат па 40-ай Жлобінскай акрузе, адзначыў:
- Падчас завярэння подпісаў намстаршыні райвыканкама Аляксей Шолак "дзяжурыў" у памяшканні. Ён жа з'яўляецца старшынёй акруговай камісіі. Відавочна, ён адсочваў, хто, якія і за каго подпісы завяраў, а потым паведамляў па месцы працы. Бо да сябры маёй ініцыятыўнай групы прыйшлі на наступны ж дзень. А у яго хутка кантракт сканчаецца…
"Праваабаронцы за свабодныя выбары"
