Маларыта: Партыйцам ва ўчастковых камісіях “не хапіла месца”
11 жніўня ў Маларыцкім райвыканкаме было прынята рашэньне стварыць усе камісіі ў колькасці 11 чалавек на 20 выбарчых участках. Ад прэтэндэнтаў паступіла 221 заява, з якіх вылучана шляхам сбору подпісаў 208 чалавек, ад працоўных калектывыў – 7 прэтэндэнтаў, ад грамадзкіх арганізацыяў – 6.
Па выбарчым участку № 62 было пададзена 13 заяваў. Сябра Партыі БНФ Пётр Андрыевіч, які быў вылучаны шляхам сбору подпісаў і чыя заява была зарэгістраваная за № 1, ня быў ўключаны ў склад камісіі: маўляў, не хапіла месца.
Па выбарчым участку № 65 было пададзена 15 заяваў. Уладзімір Малей, праваабаронца і сябра Партыі БНФ, чыя заява таксама была зарэгістраваная за № 1, ня быў ўключаны ў склад камісіі з той жа фармулёўкай: не хапіла месца.
Варта адзначыць, што ў гэтых выпадках лічбы пададзеных заяў 13 і 15 адлюстроўваюць ня колькасьць прэтэндэнтаў, якіх было насамрэч па 12, а колькасьць пададзеных заяваў (некаторыя прэтэндэнты вылучаліся некалькімі шляхамі: зборам подпісаў і ад грамадзкага аб’яднаньня). Пры гэтым п.6 ч.1 арт.34 ВК вызначае, што участковыя камісіі фармуюцца ў складзе 5-19 сябраў камісіі. Фармальнай падставай дзеля неўключэньня Уладзіміра Малея і Пятра Андрыевіча ў склад участковых камісіяў паслужыў аргумент, што выканкам прыняў рашэнне абмежаваць колькасць сяброў участковых выбарчых камісій аднолькава па 11 чалавек “з мэтай эканоміі грашовых сродкаў”.
“Праваабаронцы за свабодныя выбары”
