У Воршы пракуратура адмовілася прыняць скаргу ў сухотнікаў

У Аршанскай раённай пракуратуры сёньня адмовіліся прыняць скаргу Натальлі і Валерыя Драбышэўскіх на кепскія ўмовы ўтрыманьня ў Багушэўскім абласным шпіталі для сухотнікаў. Прычым, супрацоўнікі пракуратуры спаслаліся на тое, што горад Багушэўск знаходзіцца ў Сеньненскім раёне, а не ў Аршанскім. Драбышэўскія ж лічаць такое рашэньне няправільным, бо самі яны — жыхары Воршы.

Сёньня ж па пошце яны накіравалі скаргі ў пракуратуры Воршы і Сянна, а таксама ў Віцебскі абласны аддзел аховы здароўя.

Валер і Натальля пратэстуюць супраць кепскіх умоваў утрыманьня ў шпіталі для сухотнікаў: дрэннага харчаваньня, адсутнасьці гарачай вады, абмежаваньняў у прагулках, антысанітарыі ў палатах, паведамляе “Радыё “Свабода”.

Як стала вядома ПЦ “Вясна” Драбышэўскіх напярэдадні выпісалі са шпіталя на амбулаторны нагляд. Маўляў, нам тут апазіцыянеры не патрэбны, выпісвайцеся.  

Нагадаем, нядаўна праваабаронцы з Воршы разам з карэспандэнтам “Народных навінаў Віцебску” наведалі Багушэўскі абласны шпіталь. Хворыя паскардзіліся на парушэньне санітарна-бытавых умоў, на дрэннае харчаваньне, адсутнасьць радыёкропак, газэт тэлевізараў, магчымасьці наведваць лазню і карыстацца душам.

Шматлікія пацыенты ў сувязі з адсутнасьці прапіскі або пашпартоў гадамі ня могуць аформіць атрыманьне пенсій і таму жывуць зусім без грошай.