У Салігорску аштрафавалі Мілінкевіча

У судзе горада Салігорска, дзе ўвечары 15 траўня судзілі лідэра Руху «За Свабоду» Аляксандра Мілінкевіча, не пусцілі прадстаўнікоў сродкаў масавай інфармацыі.

Як паведаміла прэс-службе ГА «БАЖ» старшыня зарэгістраванага ў Літве «Праваабарончага альянсу» Людміла Гразнова, ля будынка суда, дзе праходзілі слуханні, сабралася шмат людзей — у тым ліку і журналістаў, — але на працэс нікога з іх не дапусцілі без тлумачэння прычын адмовы.

Каля 19.00 быў абвешчаны прысуд: Аляксандра Мілінкевіча, якога затрымалі 15 траўня пасля сустрэчы з жыхарамі Салігорска на гарадскім рынку, прызналі вінаватым у парушэнні арт. 23.34 КаАП і аштрафавалі на 20 базавых велічынь.