Бабруйскі праваахоўны рэйд

У рэгіёнах міліцыянты выяўляюць патэнцыйных удзельнікаў "Чарнобыльскага шляху"

Як паведаміў бабруйскі дэмакратычны актывіст і праваабаронца Ігар Ходзька, яшчэ ўчора міліцыянты прыходзілі да яго дахаты, аднак Ігара не было дома. Сёньня два супрацоўнікі міліцыі, малодшы і старэйшы лейтэнанты, засталі яго ў хаце і пацікавіліся, ці паедзе ён у Менск на "Чарнобыльскі шлях". У руках яны трымалі паперы з фотаздымкамі, на адным з якіх Ігар пазнаў свайго сябра Алеся Чыгіра, некалі звольненага за палітычныя погляды настаўніка. Міліцыянты папрасілі падпісаць пратакол, не даўшы азнаёміцца з ім. Ігар Ходзька адмовіўся.
Такім чынам, улады традыцыйна маюць намер не дапусьціць рэгіянальных актывістай да ўдзелу ў санкцыянаванай дэмакратычнай акцыі.