Чарговая “прафілактыка”, КДБ зноў цісьне на моладзь
Моладзевая актывістка з Гародні Хрысьціна Марчук 16 красавіка была выклікана ва Упраўленьне КДБ па Гарадзенскай вобласьці. У позве, якую прынесьлі на філалагічны факультэт Гарадзенскага дзяржаўнага ўнівэрсітэту імя Янкі Купалы, не пазначалася, у якасьці каго выклікаюць студэнтку ў гэтую дзяржаўную ўстанову. Позву ёй перадаў дэкан факультэту. У КДБ дзяўчына знаходзілася дзве гадзіны.
Як паведаміў гарадзенскі праваабаронца Уладзімір Хільмановіч, на пачатку размовы супрацоўнікі КДБ катэгарычна адмовіліся назваць свае прозьвішчы і пасады, на што дзяўчына адказала, што ня будзе ў такім разе даваць аніякіх афіцыйных тлумачэньняў. Прадстаўнікоў сьпецслужбаў найбольш цікавілі акалічнасьці ранейшага затрыманьня Хрысьціны ў Менску ў ліку іншых сяброў "Маладога Фронту". У канцы “гутаркі” супрацоўнікі КДБ папярэдзілі Хрысьціну Марчук пра крымінальную адказнасьць за дзейнасьць ад імя незарэгістраванай арганізацыі. Падпісваць занатаваны зьмест размовы яна адмовілася.
