Барыса Хамайду з міліцыі адпусьцілі пасьля складаньня пратаколу

Віцебскі актывіст-праваабаронца Барыс Хамайда ізноў патрапіў у поле зроку мясцовых міліцыянтаў. На гэты раз ён быў затрыманы сёньня ў цэнтры Віцебску, дзе на звычайным месцы гандляваў прэсай. Аднак, як паведаміў праваабаронцам затрыманы, міліцэйскі патруль цікавіла не столькі прэса – яны шукалі нацыянальныя беларускія сьцягі.  

Як стала вядома ПЦ “Вясна”, Хамайду даставілі ў Чыгуначны РАУС, дзе быў складзены пратакол за гандаль у неўстаноўленым месцы. Справа ў тым, што Віцебскі гарвыканкам прыняў адпаведную пастанову і цяпер любы гандаль дазволены толькі ў спецыяльна вызначаных месцах гораду. Таму і з’явілася падстава для складаньня пратаколу, які будзе накіраваны на разгляд адміністрацыйнай камісіі па месцы жыхарства. Зараз Барыс Хамайда на волі.