На актывіста АГП Аляксандра Валчаніна завялі крымінальную справу пасьля таго, як ён папрасіў прытулку ва Ўкраіне

Актывіст Аб’яднанай грамадзянскай партыі Аляксандар Валчанін заяўляе, што жодзінскія праваахоўчыя органы намагаюцца яго запалохаць. Яго абвінавачваюць у паклёпе на беларускія спэцслужбы.

25 студзеня Аляксандар Ваўчанін падаў заяву на імя ўкраінскага прэзыдэнта Віктара Юшчанкі з просьбай палітычнага прытулку ва Ўкраіне. Ён спасылаўся на тое, што ў Беларусі існуе небясьпека для ягонага жыцьця з боку беларускіх спэцслужбаў. Некаторыя СМІ надрукавалі яго зварот да ўкраінскага прэзыдэнта.

Аляксандар Ваўчанін паведаміў Радыё Свабода, што 3 лютага да яго на працу прыйшоў пракурор Жодзіна Віктар Літвіненка. Ён запатрабаваў, каб Ваўчанін паставіў свой подпіс на публікацыі звароту ў “Народнай волі” і на дакумэнце, дзе было напісана, што супраць актывіста АГП распачалі крымінальную справу за паклёп на беларускія спэцслужбы.

У жодзінскай пракуратуры не ўдалося застаць на месцы самога пракурора Віктара Літвіненку. Намесьнік пракурора Ігар Дамаронак інфармацыю аб крымінальнай справе не абверг і не пацьвердзіў.

У пракуратуры Жодзіна паведамілі, што больш падрабязную інфармацыю можна будзе атрымаць толькі 7 лютага.