Азарку Насту ізноў аштрафавалі
Актывістка маладзёжнай дэмакратычнай апазіцыі Анастасія Азарка 3 кастрычніка аштрафавана судом Нясвіжскага раёна на 31 базавую велічыню (961 тысячу беларускіх рублёў). Суд прызнаў яе вінаватай у парушэнні артыкула 17.1 Кодэкса аб адміністрацыйных правапарушэннях Беларусі — дробным хуліганстве, учыненым 25 жніўня.
Пра гэта БелаПАН паведаміў апазіцыйны палітык Павел Севярынец.
Як паведмлялася раней, 25 жніўня А.Азарка была затрымана ў Нясвіжы разам з Анастасіяй Палажанкай, Аляксандрам Дубскім і Аляксандрам Жукавым. Маладых людзей, якія ішлі па горадзе ў начны час, абвінавацілі ў хуліганстве, якое праявілася ў нанясенні на агароджу надпісу "Беларусь — гэта сьвятое". Усе чацвёра правялі ноч у Нясвіжскім раённым аддзеле ўнутраных спраў, пасля чаго былі адпушчаны.
"Мне здаецца, улады Нясвіжа вырашылі проста даканаць Анастасію. Цяпер яе прызналі вінаватай у дробным хуліганстве. На заўтра, 4 кастрычніка, ёй прыйшла позва з ЖЭСа з'явіцца на разгляд чарговага адміністрацыйнага пратакола. Нібыта ёсць яшчэ і трэці пратакол, невядома за што на яе складзены", — сказаў П.Севярынец.
Нагадаем, 4 верасня суд Нясвіжскага раёна прызнаў вінаватай у дзейнасці ад імя незарэгістраванай арганізацыі "Малады фронт" і аштрафаваў А.Азарку на 40 базавых велічыняў (1 млн. 240 тыс. беларускіх рублёў).
