У Рэчыцы прэвентыўна затрыманы актывіст АГП Леанід Невар
Раніцай міліцыянты прыехалі да дому, дзе пражывае партыйны дзяяч і патрабавалі адчыніць дзьверы. У выніку Леаніда Невара затрымалі і даставілі ў пастарунак, дзе ён знаходзіцца ўжо паўтары гадзіны.
Як стала вядома ПЦ "Вясна", Леаніда Невара абвінавацілі ў дробным хуліганстве на падставе заявы намесьніка старшыні райвыканкаму: нібыта яшчэ ўчора дэмакратычны актывіст паводзіў сябе непрыстойна і брудна лаяўся. Паколькі дзяжурны міліцыянт патэлефанаваў жонцы сп. Невара і папрасіў прывезьці ў аддзяленьне акуляры і лекі, зразумела, што актывіст будзе арыштаваны.
Падобныя дзеяньні ўладаў зьвязаныя з маючым адбыцца 21-22 верасьня ў Рэчыцы рэспубліканскім сьвятам "Дажынкі", у сувязі з чым супрацоўнікі міліцыі атрымалі загад нейтралізаваць апазіцыйных дзеячоў на гэты час. Трох мясцовых актывістаў Партыі БНФ, якія працуюць на дзярпрадпрыемствах ужо адправілі ў камандыроўкі, астатнія знаходзяцца пад пільнай увагай. Хутчэй за ўсё, гэта не апошняе затрыманьне напярэдадні мерапрыемства.
