Беларусь уводзіць візавыя санкцыі супраць амерыканскіх службоўцаў
Беларусь уводзіць візавыя абмежаванні для амерыканскіх службоўцаў у адказ на рашэнне Дзярждэпартамента ЗША аб пашырэнні спісу неўяздных беларускіх грамадзян у ЗША. "У адказ на недружалюбныя дзеянні ЗША Беларусь будзе здзяйсняць адпаведныя візавыя абмежаванні ў дачыненні пэўных катэгорый амерыканскіх афіцыйных асоб", – заявіла "Інтэрфаксу" намеснік начальніка Упраўлення інфармацыі МЗС Беларусі Марыя Ваньшына.
Яна падкрэсліла, што "меры ў адказ, якія зробіць Беларусь, ніякім чынам не адаб`юцца на чалавечых кантактах паміж беларускімі і амерыканскімі грамадзянамі". Насупраць улады Беларусі плануюць у аднабаковым парадку спрасціць афармленне віз грамадзянам ЗША для ўезду з гасцявой і дзелавымі мэтамі для "садзейнічання развіццю міжасобасных кантактаў".
Як адзначае намесніца начальніка ўпраўлення інфармацыі – начальніца аддзела прэс-службы беларускага МЗС Марыя Ваньшына, "пасля выканання неабходных унутрыдзяржаўных працэдур будзе ўсталяваны парадак, паводле якога візы на ўезд з згаданымі мэтамі на тэрмін да 30 дзён грамадзянам ЗША, як правіла, будуць афармляцца без запрашэнняў і на падставе толькі запоўненых візавых анкет". "Гэты крок з`яўляецца актам добрай волі і пацвярджае дружалюбны характар беларускай знешняй палітыкі", – падкрэслівае Ваньшына.
Нагадаем, на пачатку жніўня Дзярждэпартамент ЗША увёў візавыя абмежаванні для новых катэгорый беларускіх службоўцаў. У гэты спіс патрапілі службоўцы ўзроўню намеснікаў міністраў і вышэй альбо прыроўненыя да іх, генеральны пракурор і яго намеснікі, афіцэры МУС і КДБ у званні вышэй падпалкоўніка, супрацоўнікі ідэалагічных аддзелаў Менскага гарадскога і абласных выканкамаў, кіраўнік Адміністрацыі прэзідэнта і яго намеснікі, сябры ЦВК і старшыні абласных выбарчых камісій, старшыні абласных і раённых судоў, старшыня Канстытуцыйнага суду, дырэктары дзяржпрадпрыемстваў і іх намеснікі, а таксама мужы і жонкі пералічаных вышэй службоўцаў.
Як адзначалася ў заяве амбасады ЗША, рашэнне аб пашырэнні спісу было прынятае ў сувязі з тым, што праз год пасля ўвядзення візавых абмежаванняў у дачыненні вышэйшых службовых асоб Беларусі "рэжым Аляксандра Лукашэнкі працягвае адпраўляць за краты і пераследаваць грамадзян за выказванні ў абарону дэмакратыі, правядзенне мірных дэманстрацый і выступы супраць рэпрэсіўнай палітыкі рэжыму".
