Таварыства “Альянс-мэдыя”, заснавальнік газеты “Обозреватель”, зьвярнулася ў суд Ленінскага раёну Мінску з іскам аб кампэнсацыі каля 1 мільёну рублёў дадатковых судовых выдаткаў у справе, зьвязанай з артыкулам у недзяржаўанй газеце “Народная волі” “Как “Обозреватель” Сергея Атрощенко по-бандитски обошелся с Леонидом Левиным”.

У лютым 2004 года суд Ленінскага раёну Мінску часткова задаволіў пазоў Сяргея Атрошчанкі да “Народнай волі”. Газэта зьвярнулася з касацыйнай скаргай, якую суд не задаволіў. Таварыства “Альянс-мэдыя”, якім валодае Сяргей Атрошчанка, сьцьвярджае, што судовыя выдаткі ў выніку разгляду касацыйнай скаргі склалі 836 тысяч рублёў, і хоча спагнаць іх з “Народнай волі, паведамляе «Радыё Свабода».

А 28 верасьня ў судзе Маскоўскага раёну Мінску адбудзецца разгляд пазову дэпутата групы «Рэспубліка» генэрала Валера Фралова да газэты “Обозреватель”. Фралоў патрабуе ад рэдакцыі газэты 100 мільёнаў рублёў кампэнсацыі з нагоды публікацыі артыкулу пад назовам “Дэпутаты Касьян, Навасяд і Фралоў — асабовыя антысэміты?”.