Затрыманні маладафронтаўцаў, папаўненні ў спісах "экстрэмістаў" і "экстрэмісцкіх" фармаванняў: хроніка пераследу 21-22 сакавіка Дапоўнена

У Беларусі не спыняюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі матэрыяламі і фармаваннямі". Праваабарончы цэнтр "Вясна" 21-22 сакавіка 2024 году збірае факты палітычнага пераследу беларусаў і беларусак – інфармацыя ўвесь час дапаўняецца.

Пасля размовы з правакатарам Юрыем Комарам у чат-рулетцы затрымалі мужчыну

У размове з Комарам мужчына сказаў, што не падтрымлівае мірныя пратэсты і што «дайце мне і маім сябрам аўтамат — я бы выходзіў на мітынгі зусім па-іншаму».

Юрый Комар «разводзіць» людзей на шчырыя размовы пра іхнія палітычныя погляды, а пасля выкладае відэа ў сеціва, каб яго суразмоўцаў затрымаў ГУБАЗіК.

У Лагойску затрымалі ўсю сям'ю каліноўца Дзяніса Урбановіча

«Малады фронт» у сваім акаўнце ў тэлеграме паведаміў пра затрыманне з 19 па 22 сакавіка 18 маладафронтаўцаў, піша "Наша Ніва".

Затрыманыя таксама два браты кіраўніка «Маладога фронту» — Максім і Арцём, а таксама бацька Іосіф і сястра Марыля Урбановіч.

Паведамляецца, што ўсе затрыманыя ГУБАЗіКам, а Максім быў моцна збіты супрацоўнікамі КДБ, пасля чаго быў этапаваны ў СІЗА КДБ.

Таксама ўчора вечарам і сёння раніцай у Лагойску былі затрыманыя яшчэ чатыры 4 чалавекі, адзін з іх маладафронтавец Мікіта Пацёмкін, Ігар Урбановіч, імёны яшчэ двух хлопцаў правяраюцца, паведамляе МФ.

Па ўдакладненай інфармацыі, першапачаткова ў канале МФ паведамлялася, што затрыманая ўся сям'я, але наколькі вядома, забралі ўсё ж толькі Максіма.

У "Спіс экстрэмістаў" дадалі яшчэ 32 прозвішчы — цяпер у ім 3914 чалавек

22 сакавіка МУС зрабіла традыцыйны пятнічны апдэйт «Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».

Сярод іншых, у спіс дадалі грамадзяніна Расіі Сяргея Калеснікава, грамадзянку Украіны Людмілу Ганчарэнка, інжынера Уладзіміра Фішмана.

У Гродне жорстка затрымалі мужчыну, які вярнуўся з Польшчы на радзіму

Сілавікі абвінавацілі яго ва ўдзеле ў паслявыбарчых акцыях пратэсту.

Паводле інфармацыі @mediazona_by, затрыманы — Павел Кебіч.

У Мінску затрыманы брат Дзяніса Урбановіча

Сілавікі затрымалі брата Дзяніса Урбановіча Максіма два дні таму, паведамляюць крыніцы @belsat.  Па іх інфармацыі, незадоўга да затрымання супрацоўнікі ГУБАЗіК прайшліся па сваяках Дзяніса Урбановіча. Супраць самога Дзяніса заведзена крымінальная справа. Яго абвесцілі ў вышук.

Пакуль Максім Урбановіч, знаходзіцца ў следчым ізалятары. Хутчэй за ўсё супраць яго ўзбуджана крымінальная справа па трох артыкулах, але па якіх канкрэтна пакуль невядома. Сваякі не даюць ніякіх каментароў наконт гэтай сітуацыі.

У Беларусі новае "экстрэмісцкае фармаванне" — тэлеграм-чат «Здравый смысл на Алибегова»

Адпаведнае рашэнне прынятае КДБ 18 сакавіка.

Паводле ведамства, дачыненне да чату маюць ягоная кіраўніца Ганна Краўчанка, а таксама ўдзельнікі і ўдзельніцы Аляксейчык, Бадрэнка, Емяльянаў, Жыльская, Зачапіла, Карліёнава, Ліхачэўская, Мышко, Нгуен, Прашчаева, Сашнікава, Сіленка, Фёдарава, Фяцісава, Хмялеўская, Шабашова, Шорахаў.

Чарговае папаўненне "Спіса экстрэмісцкіх матэрыялаў"

У яго трапілі:

Telegram-каналы і чаты «Belarussische Diaspora in Ӧsterreich», «Беларуский OSINT Phoenix», «Моладзевы Наступ», «BY_UA политика: Беларусы в Украине», «Акции "УЛЬТИМАТУМ". Канал»;
Instagram старонкі «bymedsol», «bg.live_365»;
YouTube-канал «ОД СДЖ»;
Сацсеткі «Aleh Auchynnikau»;
Сайт «reform.bу»;
Старонкі ў «Аднакласніках» «Алексей Блинников», «Амстердамкая паказуха»;
TikTok-старонкі «onlynewsbelarus», «Harodzenski mapper», «prezident.sveta», «Дысідэнт BY», «Сэмэн Сэмэныч», «revolucioner», «Святая Лукер’я Рыгораўна».