Затрыманне сямейнай пары ў Мінску, новая крымінальная справа ў Гомелі: хроніка пераследу 9 жніўня Дапоўнена

У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць экстрэмісцкімі матэрыяламі і экстрэмісцкімі фармаваннямі. Адбываюцца рэпрэсіі ў дачыненні да грамадзян, якія актыўна выказваюць сваю пазіцыю ў адносінах да вайны, распачатай узброенымі сіламі Расіі. Праваабарончы цэнтр "Вясна" 9 жніўня збірае факты палітычнага пераследу беларусаў і беларусак – інфармацыя ўвесь час дапаўняецца.

Затрымалі сямейную пару, вінавацяць ва ўдзеле ў пратэстах у 2020-м

Затрыманых мінчукоў клічуць Вольга і Дзмітрый Разведчыкавы. Яны жанатыя больш за 15 гадоў, і ў іх двое непаўналетніх дзяцей.

Пару вінавацяць ва ўдзеле ў пратэстах. У відэа сілавікоў таксама дэманструюцца паведамленні Вольгі з сяброўскага чата пад назвай «Санта крыса!», у якім усе людзі падпісаныя ўласнымі імёнамі. Як паведамляе @nashnaiva, імаверна, спачатку затрымалі кагосьці з сяброў пары, а пасля вышлі на Разведчыкавых.

Канал ГУБАЗіК сцвярджае, што гэта ўжо трэцяя пара затрыманых з чата «Санта крыса!».

У Беларусі перастаў адкрывацца папулярны літоўскі сайт Delfi

Пры спробе загрузіць старонку на некаторых прыладах з'яўляецца надпіс, што доступ абмежаваны паводле рашэння Міністэрства інфармацыі, паведамляе Беларуская асацыяцыя журналістаў.

Жыхара Гомеля абвінавачваюць ва ўдзеле ў тэрарыстычнай арганізацыі

Следчыя прад'явілі абвінавачванне жыхару Гомеля ва ўдзеле ў тэрарыстычнай арганізацыі і распальванні нацыянальнай варожасці і варажнечы.

Па дадзеных следства, 59-гадовы жыхар Гомеля нібыта падтрымліваў ідэі радыкальных ячэек і вырашыў далучыцца да рэалізацыі планаў дэструктыўных элементаў і экстрэмістаў. Ён зарэгістраваўся ў тэрарыстычнай арганізацыі "План Перамога" і пакідаў абразлівыя каментары на адрас расейскіх вайскоўцаў, якія ўдзельнічаюць у спецаперацыі ва Украіне. Акрамя таго, затрыманы пакінуў абразлівыя каментары на адрас Прэзідэнта Беларусі.

Мужчыну выставілі абвінавачванне паводле арт.130 (распальванне нацыянальнай варожасці і варожасці), арт. 368 (абраза Аляксандра Лукашэнкі) і ч. 3 арт. 361-1 (удзел у экстрэмісцкім фармаванні) КК.

Крымінальная справа перададзена пракурору для накіравання ў суд.

ГУБАЗіК затрымаў беларуса за тое, што ён у World of Tanks размясціў "Пагоню"

Пра затрыманне паведамляюць праўладныя тэлеграм-каналы.

На «пакаяльным відэа» мужчына кажа, што пакідаў абразлівыя каментары ў telegram-каналах і наведаў адну з паслявыбарчых акцый пратэсту.

Чарговае папаўненне Спіса экстрэмісцкіх матэрыялаў

На гэты раз у яго трапілі:

Telegram-каналы «Орша Восточка», «Вольны Захал TUT», «Volny Belarus», «Apeikin. Спорт, палітыка ды рок-н-рол», «Вот так дела»;
інтэрнет-рэсурс «Кошт урада»;
сацсеткі і лагатып праекту «Альянс расследователей Беларуси»;
сацсеткі і лагатып праекту «Задзіночанне Беларускіх Студэнтаў»;
TikTok-старонкі «rаbochi_rux», «merchfreеdom», «nastassia.rouda», «hajtaktv», «novychas».

За каментары ў сацсетках затрыманы жыхара Кобрына, які вярнуўся з ЕС

Затрыманы Канстанцін Біч на «пакаяльным» відэа кажа, што раней прыцягваўся па адміністрацыйным артыкуле 19.11 КаАП, а таксама атрымаў штраф за тое, што вывешваў БЧБ-сцяг. Паводле яго, затрыманы ён за абразу супрацоўніка міліцыі ў сацсетках.

Праўладныя тэлеграм-каналы паведамляюць, што нядаўна мужчына вярнуўся ў Беларусь з краін ЕС.

Інфармацыя дапаўняецца.