"У думках з тымі, хто сустракае гэты дзень за кратамі". Міжнародная супольнасць віншуе “Вясну” з днём народзінаў
26 красавіка 1996 года – дзень народзінаў Праваабарончага цэнтра "Вясна". У гэты дзень было жорстка разагнанае мірнае шэсце "Чарнобыльскі шлях". Міліцыя затрымала сотні чалавек. Алесь Бяляцкі, на той час дырэктар літаратурнага музея імя Максіма Багдановіча, аб’яднаўся з паплечнікамі, каб дапамагаць затрыманым дэманстрантам. Так з’явілася "Вясна".
Сёння прадстаўнікі міжнароднай супольнасці віншуюць нас са святам і патрабуюць вызвалення палітзняволеных вясноўцаў.
Пастаяннае прадстаўніцтва Францыі пры АБСЕ павіншавала "Вясну" з днём народзінаў і нагадала, што цяпер за кратамі знаходзяцца шэсць сябраў арганізацыі.
“Östgruppen, разам з калегамі з грамадзянскай супольнасці ў Доме Салідарнасці ў Стакгольме, віншуе сёння нашых дарагіх сяброў з “Вясны”, у 27-ю гадавіну арганізацыі!”
Амерыканская амбасада ў Мінску:
"27 гадоў таму заснаваная праваабарончая арганізацыя “Вясна”. Наша ім пажаданне – свабода для ўсіх палітвязняў і шасцярых вясноўцаў: Нобелеўскага лаўрэата Алеся Бяляцкага, Валянціна Стэфановіча, Уладзіміра Лабковіча, Марфы Рабковай, Леаніда Судаленкі і Андрэя Чапюка".
Літоўскі дыпламат Аста Андрыяўскіене:
“Сёння вядомая праваабарончая арганізацыя “Вясна” адзначае сваю 27-ю гадавіну ў сваім Віленскім офісе. Лідар “Вясны”, лаўрэат Нобелеўскай прэміі міру Алесь Бяляцкі і яшчэ 1500 палітвязняў адбываюць працяглыя тэрміны зняволення”.
Амбасадарка Ірландыі ў Літве Шэйна Макх'ю:
“Цягам 27 гадоў “Вясна” мужна і ўпорна працуе над прасоўваннем правоў чалавека ў Беларусі. Задача, актуальнасць якой штодзень расце”.
Праваабаронца і выкладчыца Вышэйшай школы палітычных навук у Парыжы Саша Кулаева:
“З днём нараджэння дарагія сябры!
У думках з тымі, хто сустракае гэты дзень за кратамі, у высылцы ці пад жорсткімі рэпрэсіямі!”
Праваабарончая арганізацыя ARTICLE 19 ECA:
“Амаль тры дзесяцігоддзі «Вясна» знаходзіцца ў авангардзе праваабарончага руху ў Беларусі, падтрымліваючы грамадзянскую супольнасць і дэмакратычныя змены. За кратамі застаюцца шэсць яе сябраў — у тым ліку лаўрэат Нобелеўскай прэміі міру Алесь Бяляцкі”.
Еўрапейская платформа за дэмакратычныя выбары:
“Шчыра віншуем нашага чальца ПЦ “Вясна” з 27 гадамі абароны правоў чалавека ў Беларусі. На жаль, шасцёра нашых калегаў з «Вясны» не змогуць святкаваць, бо знаходзяцца ў няволі. Мы заклікаем да іх неадкладнага і безумоўнага вызвалення”.
