Затрыманне псіхолага і арганізатара вулічных гонак, рэйды ў рэгіёнах: хроніка пераследу 13-14 красавіка Дапоўнена
У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць экстрэмісцкімі матэрыяламі і экстрэмісцкімі фармаваннямі. Адбываюцца рэпрэсіі ў дачыненні да грамадзян, якія актыўна выказваюць сваю пазіцыю ў адносінах да вайны, распачатай узброенымі сіламі Расіі. Праваабарончы цэнтр "Вясна" 13-14 красавіка збірае факты палітычнага пераследу беларусаў і беларусак – інфармацыя ўвесь час дапаўняецца.
|
Калі вас ці вашых блізкіх затрымалі, паведамляйце нам:
|
Стала вядома пра затрыманне псіхолага і былога супрацоўніка БДПУ Сяргея Іванцова
Як паведамляе праўладны тэлеграм-канал, яго затрымалі за тое, што ён нібыта пісаў каментары ў чат-бот канала «Беларусь галаўнога мозга». Паведамляецца, што ён у СІЗА і супраць яго заведзена крымінальная справа па двух артыкулах (якіх — не ўдакладняецца), піша «Наша Ніва».
КДБ дадаў яшчэ аднаго чалавека ў "тэрарыстычны спіс"
Камітэт дзяржаўнай бяспекі абнавіў спіс «асоб, якія маюць дачыненне да тэрарыстычнай дзейнасці» — там з'явілася прозвішча Алега Зубовіча. Паведамляецца, што 27-гадовы мужчына быў асуджаны паводле арт. 130 КК (Распальванне варожасці).
Цяпер у «тэрарыстычным спісе» 1039 чалавек, з іх 291 — беларусы (адзначым, што ў спісе КДБ 1046 пазіцый, аднак 7 чалавек з яго былі выдаленыя раней).
З'явілася "пакаяльнае відэа" з арганізатарам вулічнай гонкі пад Брэстам, якую разагналі сілавікі
Паведамляецца, што 3 затрыманых атрымалі пратаколы за парушэнне парадку арганізацыі або правядзення масавых мерапрыемстваў, 8 машын і 1 матацыкл былі змешчаныя на штрафстаянку, а 11 чалавек атрымалі адміністрацыйныя пратаколы за парушэнне ПДР.
Дырэктарку "Слаўцэнтру" Ірыну Зімневу аштрафавалі на 20 базавых велічыняў, але не адпусцілі
Праваабаронцам стала вядома, што сёння ў судзе Маскоўскага раёну суддзя Таццяна Мотыль прызначыла Ірыне Зімневай штраф — 20 базавых велічыняў (740 рублёў) паводле арт. 19.1 КаАП («Хуліганства»).
Пасяджэнне праходзіла анлайн, Ірыне ставілі ў віну, нібыта яна «лаялася на міліцыянтаў». Справу разглядалі два дні: пасля таго, як Мотыль заслухала Ірыну і яе абаронцу, суддзя абвесціла перапынак да наступнай раніцы 13 красавіка.
Зраніцы ж адбыліся вобшукі ва ўсіх офісах «Слаўцэнтру», была вынутая тэхніка. Затрымалі таксама мужа Ірыны Аляксея — ён дагэтуль знаходзіцца ў РАУС. Саму Зімневу пасля штрафу таксама не адпусцілі, дакладна невядома, дзе яна цяпер знаходзіцца. Таксама невядома, ці гэта затрыманне паводле новай справы, ці іншая працэдура.
Нагадаем, дома ў сямейнай пары застаюцца дзве непаўнагадовыя дачкі.
ГУБАЗіК затрымаў мужчыну, які перайшоў па фэйкавай спасылцы нібыта ад плана "Перамога"
Праўладныя тэлеграм-каналы распавялі пра першую ахвяру новай фэйкавай рассылкі нібыта ад плана «Перамога». Мужчыну клічуць Андрэй Варонін, ён жыве на Грушаўцы.
ГУБАЗіК сцвярджае, што яго віна ў тым, што ён павёўся на фэйкавую рассылку «Байпола» (яна заваблівала абяцаннем, што там нібыта можна было праверыць, ці ёсць ты ў базе сілавікоў). Ці заведзеная супраць яго адміністрацыйная ці крымінальная справа і што менавіта яму закідаюць — не паведамляецца, піша «Наша Ніва».
Паведамляецца пра рэйды сілавікоў у Пружанах і Пінску
Паводле інфармацыі Берасцейскай Вясны, учора ў Пружанах адбыліся масавыя затрыманні — гаворка ідзе пра амаль 20 чалавек. У людзей праводзілі ператрусы, правяралі тэлефоны, з іх удзелам запісвалі «пакаяльныя відэа». Пасля гэтага большасць адпусцілі дамоў, але ж ёсць і тыя, каго пакінулі ў ІЧУ «у чаканні суда».
А ў Пінску сілавікі актыўнічаюць яшчэ з папярэдняга тыдня: яны ходзяць па дамах, на працу. Сілавікі завітваюць нават да людзей, якія толькі аднойчы былі асуджаны па палітычнай адміністрацыйнай справе яшчэ ў 2020 годзе. Па паведамленнях, з людзьмі праводзяцца «прафілактычныя размовы», праводзяць «агляд» хаты, а таксама настойліва прапануецца паказаць свой тэлефон.
Пасля рэйду сілавікоў у Дзяржынску больш за дзесяць чалавек змясцілі ў СІЗА па "народным" артыкуле
Паводле інфармацыі праваабаронцаў, па выніках рэйду ў Дзяржынску, што праходзіў з 31 сакавіка па 3 красавіка, у СІЗА па арт. 342 КК («Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх») было адпраўлена больш за 10 чалавек.
Чарговае папаўненне Спіса экстрэмісцкіх матэрыялаў
У яго трапілі:
Telegram-каналы «Палеская Вясна», «Витебск Черняховка», «Беларусь: падзеі», «Беларускі Бабілон»;
Facebook-старонка «Euroradio».
Улады прызналі "экстрэмісцкімі" медалі Аб'яднанага пераходнага кабінета
Як паведамляюць праўладныя тэлеграм-каналы, рашэннем суда Цэнтральнага раёна Мінска сімволіка і атрыбутыка — медаль з надпісам на аверсе «Гонар i Годнасць» і з надпісам на рэверсе «Беларусь перадусiм!» з калодкай, абцягнутай стужкай блакітнага колеру з бел-чырвона-белай устаўкай у цэнтры, — а таксама яе лічбавыя выявы прызнаны экстрэмісцкімі матэрыяламі.
Адзначым, што ў Рэспубліканскім спісе экстрэмісціх матэрыялаў інфармацыі пра медалі пакуль няма.
У "Спіс экстрэмістаў" дадалі яшчэ 21 прозвішча — цяпер у ім 2712 чалавек
14 красавіка МУС зрабіла традыцыйны пятнічны апдэйт «Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».
Акрамя іншых, у спіс дадалі «рэйкавых партызанаў» Дзмітрыя Равіча, Дзяніса Дзікуна і Алега Малчанава, мужа і жонку Аляксандра і Таццяну Біруляў, айцішніка Дзмітрыя Буйвідовіча.
Асуджанага да "хатняй хіміі" экс-удзельніка шоу "Дом-2" арыштавалі на 15 сутак за парушэнне рэжыму
За парушэнне рэжыму адбыцця пакарання суд арыштаваў на 15 сутак асуджанага на 3 гады «хатняй хіміі» экс-удзельніка шоу «Дом-2» Давіда Анташвілі, распавёў «Медыязоне» яго знаёмы.
Анташвілі затрымалі 7 красавіка, ён знаходзіцца ў ІЧУ.
Сілавікі затрымалі экс-удзельніка шоу «Дом-2» у кастрычніку 2022 года. У снежні 2022 года суд прысудзіў яму 3 гады «хатняй хіміі» паводле «народнага» арт. 342 КК.
У Міёрах за распаўсюд "экстрэмісцкіх" матэрыялаў работніка мясакамбіната арыштавалі на 7 сутак
Як паведаміла Віцебская Вясна, суддзя суда Міёрскага раёна Ірына Яскевіч 4 красавіка пастанавіла за распаўсюд «экстрэмісцкіх» публікацый у сацыяльнай сетцы Інстаграм падвергнуць адміністрацыйнаму арышту тэрмінам на 7 сутак жыхара Міёраў Яўгена Бурака, які працуе абвальшчыкам мяса на мясцовым мясакамбінаце.
Згодна з пратаколам, які паступіў у суд з аддзялення міліцыі, Яўген, у асабістым профілі, адкрытым для агляду 306 падпісчыкам, размясціў і захоўваў з мэтай распаўсюджвання інфармацыйную прадукцыю, уключаную ў рэспубліканскі спіс экстрэмісцкіх матэрыялаў.
У судовым пасяджэнні Бурак растлумачыў, што не аспрэчвае факта знаходжання ўказанай у пратаколе інфармацыйнай прадукцыі, аднак названую інфармацыю з мэтай распаўсюджвання не захоўваў і не размяшчаў, падпіску ажыццявіў у 2020 годзе, калі дадзеная інтэрнет-старонка не была прызнана экстрэмісцкай.
За распаўсюд "экстрэмісцкіх матэрыялаў" затрымалі 37-гадовую Алесю Шмялёву
Як паведамляюць праўладныя тэлеграм-каналы, жанчына была падпісаная на «экстрэмісцкія» каналы, адкуль перасылала паведамленні сваім сяброўкам. Акрамя таго, яна нібыта была адміністратаркай аднаго з такіх чатаў.
У Гродне затрымалі ўладальніка этнакрамы "Цудоўня" Андрэя Несцяровіча
Затрыманне адбылося 14 красавіка. Па якой прычыне — пакуль невядома, піша Право имеют.
З ім можа быць затрымана Кацярына Шуст, якую ўжо арыштоўвалі ў сакавіку 2023 года, але пазней адпусцілі.
У Гродзенскім раёне быў затрыманы юрысконсульт СВК імя Дзеньшчыкова
На «пакаяльным відэа» Уладзімір Якубашка кажа, што быў затрыманы за перасылку дадзеных супрацоўнікаў крымінальнага вышуку ў 2020-м годзе і перасылку дадзеных супрацоўніц АМАП, а таксама за падпіску ў Instagram на «экстрэмісцкія» каналы.
ГУБАЗіК удакладняе, што мужчына змешчаны ў ІЧУ за распаўсюд экстрэмісцкіх матэрыялаў — пазней будзе дадзена прававая ацэнка распаўсюду асабістых дадзеных міліцыянтаў, піша Суды, задержания. Гродно и область.
