Затрыманне былога следчага, справу Дар'і Лосік перадалі ў пракуратуру: хроніка пераследу 2 снежня Дапоўнена
У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць экстрэмісцкімі матэрыяламі. Адбываюцца рэпрэсіі ў дачыненні да грамадзян, якія актыўна выказваюць сваю пазіцыю ў адносінах да вайны, распачатай узброенымі сіламі Расіі. Праваабарончы цэнтр "Вясна" 2 снежня збірае апошнія факты палітычнага пераследу беларускіх грамадзян – інфармацыя ўвесь час дапаўняецца.
|
Калі вас ці вашых блізкіх затрымалі, паведамляйце нам:
|
У Магілёве ГУБАЗіК затрымаў былога следчага
Па дадзеных праўладны тэлеграм-каналаў, «у каментарах затрыманы абражаў усю праваахоўную сістэму і вышэйшых службовых асоб Беларусі, а таксама ўступіў у экстрэмісцкае фармаванне», піша @vybory_smotri.
На «пакаяльным» відэа мужчына заявіў, што з 2007 па 2012 год ён праходзіў навучанне ў Акадэміі МУС Рэспублікі Беларусь, а з 2012 па 2015 год працаваў у Следчым камітэце горада Магілёва.
Справу Дар'і Лосік перадалі ў пракуратуру
Пра гэта паведамляюць праўладныя тг-каналы: "У якасці падарунка на дзень народзінаў, яе справа была перададзена пракурору для накіравання ў суд".
У чым дакладна яе абвінавачваюць, пакуль невядома. Паводле сілавікоў, Дар'ю затрымалі за «садзейнічанне экстрэмісцкай дзейнасці» (арт. 361-4 КК) — нібыта за размову з тэлеканалам «Белсат» вясной 2022 году.
Нагадаем, Дар‘ю Лосік, жонку палітвязня Ігара Лосіка, затрымалі 18 кастрычніка. Дачка Ігара і Дар'і цяпер знаходзіцца ў бабулі з дзядулем.
Палітзняволеную Таццяну Карповіч перавялі ў магілёўскую турму да суда
Таццяна Карповіч — жыхарка Віцебска, якую затрымалі 17 лістапада 2021 года.
Яе абвінавачваюць паводле арт. 130 Крымінальнага кодэксу (Распальванне сацыяльнай варожасці) за перадачу дадзеных сілавікоў, настаўнікаў, суддзяў у тэлеграм-канал "Чорная кніга Беларусі".
Нядаўна Таццяну перавялі ў магілёўскую турму № 4. Хутка над ёй можа адбыцца суд.
Вы можаце падтрымаць яе пасылкамі з рознымі прыемнымі дробязямі і смачняшкамі, а таксама грашовымі пераводамі, тэлеграмамі, паштоўкамі і лістамі салідарнасці.
Двух маладых мінчанак змясцілі да суда пад варту за сарваны дзяржаўны сцяг
Пракуратура Савецкага раёна г. Мінска санкцыянавала прымяненне меры стрымання ў выглядзе заключэння пад варту ў дачыненні да дваіх затрыманых 22 лістапада дзяўчат, якім інкрымінаваны здзек над дзяржсімволікай па арт.370 Крымінальнага кодэкса.
Згодна з матэрыяламі справы, падазраваныя, якім 18 і 19 гадоў сарвалі з фасада будынка інтэрната КТУП «Мінскі Камароўскі рынак» Дзяржаўны сцяг Рэспублікі Беларусь. Убачыўшы супрацоўнікаў органаў унутраных спраў, падазраваныя кінулі палотнішча сцяга на зямлю.
Падчас «хапуна» ў Мёрах затрымана як мінімум 13 чалавек — сярод іх «Чалавек года Віцебшчыны»
Праваабаронцам стала вядома, што падчас масавага «хапуна» ў Мёрах, што адбыўся 30 лістапада, было затрымана як мінімум 13 чалавек. Вядома, што затрымлівалі людзей на Мёрскім металапракатным заводзе, а таксама ў іншых месцах.
Паводле непацверджанай інфармацыі, затрыманні звязаныя са «злівамі» ў ЧКБ і абразы ў каментарах.
Праваабаронцам вядомы прозвішчы трох затрыманых — гэта Сяргей Ерафееў, а таксама бацька і сын: Вітольд Ермалёнак і Антон Ермалёнак.
Вітольд Ермалёнак — кіраўнік музейнага аб'яднання «Спадчына Міёрскага краю», настаўнік гісторыі вышэйшай кваліфікацыйнай катэгорыі, аўтар больш за 450 публікацый, лаўрэат Прэміі Прэзідэнта «За духоўнае адраджэнне», Чалавек года Віцебшчыны-2010.
Максім Знак адпраўлены ў ПКТ - памяшканне камернага тыпу
Аб гэтым стала вядома сёння, паведамляе пресс-служба Віктара Бабарыкі. Раней яго тройчы змяшчалі ў ШІЗА, паведамляе "Новы Час".
«Спіс экстрэмістаў» папоўніўся
У "Спіс асоб, датычных да экстрэмісцай дзейнасці" дадалі яшчэ 58 чалавек. Цяпер у ім 2117 чалавек.
2 снежня МУС чарговы раз абнавіла «Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».
У Слоніме затрымалі інжынера-праграміста
Як паведамляюць праўладныя тэлеграм-каналы, быў затрыманы інжынер-праграміст Слонімскай КПФ Аляксандр Лагута.
Паводле ГУБАЗіКа, 40-гадовы мужчына ўдзельнічаў у пратэстных акцыях, а таксама даслаў у ЧКБ дадзеныя слонімскіх сілавікоў.
Улады пачалі прызнаваць «экстрэмісцкімі» дыяспарскія чаты беларусаў
Суд Ленінскага раёну Гродна 30 лістапада прызнаў «экстрэмісцкімі матэрыяламі» Telegram-чат «Беларусы Вроцлава ЧАТ».
Верагодна, гэта першы чат беларускай дыяспары, які ўлады прызналі «экстрэмісцкім».
Інфармацыя дапаўняецца.
