Жыхару Брэста прысудзілі тры гады калоніі за выказванні на адрас супрацоўніка КДБ Федасюка і абразу Лукашэнкі
Алег Дутчык
Суд Ленінскага раёна Брэста 24 кастрычніка вынес прысуд 48-гадоваму індывідуальнаму прадпрымальніку Алегу Дутчыку. Яго абвінавацілі ў дыскрэдытацыі Рэспублікі Беларусь (арт. 369-1 Крымінальнага кодэкса) і абразе Аляксандра Лукашэнкі (ч. 1 арт. 368 Крымінальнага кодэкса).
Справу разглядаў суддзя Андрэй Грушко, дзяржабвінаваўца — памочніца пракурора Ганна Горбач.
Па матэрыялах абвінавачання, напрыканцы верасня 2021 года Алег Дутчык размясціў у сацыяльнай сетцы “ВКонтакте” каментарый, у якім негатыўна адазваўся пра гібель супрацоўніка КДБ Дзмітрыя Федасюка ў Мінску.
Акрамя гэтага, на працягу мінулага года неаднаразова размяшчаў у розных суполках негатыўныя выказванні з абразамі на адрас прэзідэнта, прыніжаў ягоныя гонар і годнасць.
Апошні допіс у ягоным акаунце "ВКонтакте": "Арышт — гэта абмежаванне волі". Ён быў зроблены 27 сакавіка.
У ходзе судовага працэсу Дутчык сваю віну не прызнаў.
Суд пастанавіў пакараць Алега Дутчыка пазбаўленнем волі тэрмінам на тры гады ва ўмовах агульнага рэжыму, а таксама штрафу ў памеры 100 базавых велічынь, або 3 200 рублёў.
