75-гадовай Ніне Багінскай забаранілі выязджаць з Беларусі, наведваць казіно, а таксама гуляць у азартныя гульні

У судзе Першамайскага раёну Мінска 19 жніўня адбыўся судовы працэс у дачыненні да 75-гадовай актывісткі Ніны Багінскай па па пытаннях забеспячэння выканання выканаўчага дакумента. У красавіку ёй прызначылі 1600 рублёў штрафу за тое, што яна выйшла са сцягам у цэнтр Мінска на Дзень Волі. Штраф Багінская аплочваць не стала, таму ў дачыненні да Багінскай былі накладзеныя абмежаванні — адразу судовым выканаўцам, а потым — судом. Справу разглядала суддзя Вольга Чарніковіч.

Ніна Багінская. Фота з асабістага архіву

8 жніўня намесніца старшыні аддзела прымусовага выканання Першамайскага раёна Мінска М.В. Саранчук забараніла Багінскай паляваць, кіраваць машынай і маламернымі судамі, а аператарам сувязі А1, МТС, "Белтэлеком", "БеСТ" забаронена прадастаўляць актывістцы паслугі інтэрнета, мабільнай сувязі і тэлебачання. Акрамя таго, зноў накладзены арышт на два лецішчы Багінскай — ён быў зняты некалькі месяцаў таму, бо іх не атрымалася прадаць. Пры гэтым, судовы выканаўца не выявіў у жанчыны іншай маёмасці, на якое можна накласці спагнанні.

Але гэтага падалося мала, таму аддзел прымусовага выканання Першамайскага раёна Мінска звярнуўся ў суд, які прасіў абмежаваць 75-гадовай актывістцы выезд з Беларусі, а таксама абмежаваць у наведванні ігральных устаноў, віртуальных ігральных устаноў і ўдзеле ў азартных гульнях. Гэтыя патрабаванні ў судзе 19 жніўня падтрымлівала сама намесніца старшыні аддзела прымусовага выканання Першамайскага раёна.

Ніна Багінская на судзе патрабаванні не прызнала.

У выніку суддзя Вольга Чарніковіч падтрымала патрабаванні аддзела прымусовага выканання Першамайскага раёна Мінска і забараніла актывістцы выязджаць з Беларусі, наведваць ігральныя установы, а таксама гуляць у азартныя гульні.