Беларуску Яну Пінчук дэпартуюць у Беларусь, дзе яе чакае да 20 гадоў зняволення
Яна Пінчук
У Другім апеляцыйным судзе агульнай юрысдыкцыі Санкт-Пецярбурга 21 ліпеня вынесенае канчатковае рашэнне аб дэпартацыі ў Беларусь Яны Пінчук, якую дома чакае крымінальны пераслед. Адвакаты Яны хацелі абскардзіць рашэнне гарадскога суда, які пакінуў у сіле рашэнне Генеральнай Пракуратуры РФ аб выдачы дзяўчыны ў Беларусь.
Раней праваабаронцы паведамлялі, што судовае пасяджэнне было перанесенае з 13 на 21 ліпеня, паколькі Пінчук належным чынам не апавясцілі аб прызначэнні даты суда, што з’яўляецца грубым працэсуальным парушэннем.
Актывістка з Віцебску была затрымана 1 лістапада 2021 года ў Санкт-Пецярбургу па запыце беларускіх сілавікоў. А 3 лістапада мясцовы раённы суд абраў для яе меру стрымання ў выглядзе ўтрымання пад вартай, якая потым была працягнутая. На радзіме за адміністраванне тэлеграм-каналу «Віцебск 97%» супраць яе былі выстаўлены абвінавачанні адразу па 5 крымінальных артыкулах, сярод якіх распальванне нацыянальнай варожасці (ч. 3 арт.130), заклікі да дзеянняў супраць нацыянальнай бяспекі (ч. 3 артыкула 361), паклёп (арт. 188) і іншыя.
За час знаходжання за кратамі Яна паспела выйсці замуж, як яна паведаміла «хоць і ў СІЗА але ўсё роўна па каханні».
На думку расейскіх праваабаронцаў крымінальны пераслед актывісткі палітычна матываваны. І патрабавалі ад уладаў даць ёй прытулак.
Паводле следства, у тэлеграм-канале "Віцебск 97%", Яна Пінчук пад нікам "Прынцэса Лея" размяшчала паведамленні з «негатыўнай ацэнкаю супрацоўнікаў праваахоўных органаў і органаў дзяржаўнай улады». Акрамя таго, нібыта публікавала "заклікі да прычынення шкоды міліцыянтам" і "экстрэмісцкія матэрыялы". Пра якія канкрэтна матэрыялы ідзецца, невядома, адзначаюць адвакаты дзяўчыны.
Апроч таго, яе муж у інтэрв'ю "Медыязоне" паведаміў, што даведаўся пра стан жонкі з ліста. Ён распавёў, што Пінчук хварэе «ўжо амаль месяц» і не атрымлівае ніякай медыцынскай дапамогі. Нягледзячы на тэмпературу 39 градусаў, ёй не давалі лекаў.
"Мы пісалі скаргу ў пракуратуру пра гэта, але зноў жа беспаспяхова. На гэты момант тэмпературы няма, але застаўся моцны кашаль, а ўлічваючы хранічную астму Яны, гэта можа прывесці да цяжкіх наступстваў. А зараз стала вядома, што на працягу 4 дзён у Яны балела рука, а сёння раніцай яна перастала яе адчуваць і не можа ёю паварушыць. Замест абавязковай меддапамогі, Яна зафіксавала руку кардонкай і бінтам", — цытуюць Мікіту Сафронава ў канале.
На выкананне судовага рашэння даецца 15 дзён.
Апеляцыю Яны Пінчук на рашэнне аб дэпартацыі перанеслі. У Беларусі яе чакае вялікі тэрмін зняволення
