Затрыманні, звальненні, суды: хроніка пераследу 4 красавіка Дапоўнена
4 красавіка ў Беларусі па-ранейшаму працягваюцца затрыманні, ператрусы, катаванні ў ізалятарах, ціск на палітвязняў, а таксама прызнанне незалежных медыяпрадуктаў экстрэмісцкімі матэрыяламі. Адбываюцца рэпрэсіі ў дачыненні да грамадзян, якія актыўна выказваюць сваю грамадзянскую пазіцыю ў адносінах да вайны, распачатай узброенымі сілы Расійскай Федэрацыі. Праваабарончы цэнтр «Вясна» збірае апошнія факты палітычнага пераследу ў Беларусі.
|
Калі вас ці вашых блізкіх затрымалі, паведамляйце нам:
|
Затрыманы чарговы супрацоўнік чыгункі
30 сакавіка быў затрыманы работнік Баранавіцкага аддзялення БЧ і адміністратар тэматычных рэсурсаў Беларускай чыгункі ва «Укантакце» і «Аднакласніках» Валянцін Самасюк, паведамляе @belzhd_live.
Дзе ён зараз знаходзіцца і які ў яго статус — невядома.
Зноў затрыманы ксёндз Аляксандр Баран
Пра гэта паведамляе група "Хрысціянская візія". Настаяцель каталіцкай парафіі ў Лынтупах, ксёндз Аляксандр Баран быў затрыманы яшчэ ў пятніцу, 25-га сакавіка, і правёў трое сутак пад вартай. Пасля заканчэння 72-х гадзіннага тэрміну затрымання, у панядзелак, 28 сакавіка ён быў пакінуты пад вартай яшчэ на 72 гадзіны. У сераду, 30-га сакавіка святара выпусцілі, уручыўшы позву на судовае пасяджэнне на 4 красавіка.
Меркавалася, што затрыманне ксяндза было звязанае з ягоным удзелам у акцыях салідарнасці ў жніўні 2020 года, калі ён разам са сваімі парафіянамі выходзіў на вуліцу насупраць касцёла з кветкамі ў руках, Такім чынам пратэстуючы супраць гвалту.
Інфармацыйная прадукцыя тэлеграм-канала «БГЭУ|ИНИЦИАТИВА» прызнаная «экстрэмісцкімі матэрыяламі»
Такое рашэнне прынята па заяве пракуратуры Заводскага раёна Мінска.
У Мінску затрымалі Анастасію Санкоўскую
27-гадовую дзяўчыну абвінавачваюць ва ўдзеле ў паслявыбарных акцыях пратэсту — нібыта яны перакрывала дарогі.
Анастасіі інкрымінуецца арт. 342 КК (Арганізацыя групавых дзеянняў, груба парушаючых грамадскі парадак і падрыхтоўка альбо навучанне такой дзейнасці).
Жыхар Гомельскай вобласці яшчэ да вайны сфатаграфаваў вайсковую тэхніку і загрузіў у тэлеграм-канал — супраць яго распачалі крымінальную справу
Праўладныя тэлеграм-каналы пішуць пра затрыманне Івана Яснікава. Паведамляецца, што мужчына быў затрыманы за падзеі жніўня 2020 года, аднак у яго тэлефоне сілавікі знайшлі фотаздымкі вайсковай тэхнікі, якія ён яшчэ 23 лютага загрузіў у тэлеграм-канал «Калинковичи для жизни».
Па папярэдняй інфармацыі, распачата крымінальная справа па арт. 361-4 Крымінальнага кодэкса — садзейнічанне экстрэмісцкай дзейнасці. Гэты артыкул прадугледжвае пакаранне да 6 гадоў калоніі.
Сілавікі затрымалі стваральніка канала «Осиповичи для жизни» Яўгена Пацкевіча
Праўладныя тэлеграм-каналы паведамляюць, што 34-гадовы мужчына затрыманы за каментары ў інтэрнэце.
Яўген — былы спецназавец, пасля актыўнага ўдзелу ў пратэставых акцыях восені 2020 году яго звольнілі з Асіповіцкай ЖКГ.
Крымінальную справу ў дачыненні да Андрэя Аляксандрава, Ірыны Злобінай, Дзмітрыя Наважылава і Ірыны Леўшынай накіравалі ў суд
Палітвязняў абвінавачваюць па шэрагу артыкулаў Крымінальнага кодэксу:
- ч.2 арт. 342 (Арганізацыя групавых дзеянняў, груба парушаючых грамадскі парадак і падрыхтоўка альбо навучанне такой дзейнасці) — Аляксандраў, Злобіна;
- ч. 1 арт. 356 (Здрада дзяржаве) — Аляксандраў, Злобіна;
- ч.1 арт. 361-1 (Удзел у экстрэмісцкім фарміраванні) — Аляксандраў, Наважылаў, Леўшына;
- ч.2 арт. 243 (Ухіленні ад выплаты падаткаў і збораў) — Аляксандраў, Наважылаў.
З Інстытута мовазнаўства звольнены акадэмік
- Аляксандр Лукашанец. Фота: tut.by
З Інстытута мовазнаўства звольнены акадэмік Аляксандр Лукашанец. Пасля прэзідэнцкіх выбараў 2020 года і жорсткага падаўлення пратэстаў ён выступіў у відэазвароце навукоўцаў супраць гвалту.
За ўдзел у акцыях пратэсту ў 2020 годзе затрыманы, верагодна, грамадзянін Расіі
Праўладныя тэлеграм-каналы паведамляюць пра затрыманне ў Мінску 44-гадовага Максіма Матырка. Паведамляецца, што яму інкрымінуецца арт. 342 КК (удзел у дзеяннях, якія груба парушаюць грамадскі парадак).
Праўладныя тэлеграм-каналы паведамляюць пра тое, што мужчына нібыта не мае ніякага грамадзянства — толькі пасведчанне на жыхарства ў Беларусі. Аднак Максім распавядаў сваю гісторыю затрымання праекту «Август 2020» — там ен казаў, што ўжо 16 гадоў жыве ў Беларусі, але сам — грамадзянін Расіі.
Затрыманая юрыстка ААТ «Нафтан» Вераніка Бахмутава
Паведамляецца, што яе затрымалі на наўпрост працоўным месцы — надзелі кайданкі і павезлі на допыт.
Прычынай затрымання магло паслужыць фота профіля ў Facebook, на якім прысутнічае лагатып TUT.ВY. Верагодна, сёння адбудзецца суд.
У Пінску 3 красавіка затрымалі праваабаронцу і сябра Руху «За Свабоду» Алеся Рамановіча
Падрабязнасці і прычыны затрымання пакуль невядомыя. Цяпер Алесь знаходзіцца ў пінскім ІЧУ.
Міліцыя канфіскавала аргтэхніку ў віцебскага блогера, які прыдумаў «Ябацькіны новасти»
Вядомы віцебскі відэаблогер Віталь Усціновіч трое сутак адбыў у ізалятары часовага ўтрымання. Па выхадзе на волю ён паведаміў, што міліцыянты забралі ў яго ўсю аргтэхніку, таму ягоны youtube-канал, які мае больш за 45 тыс падпісчыкаў, пакуль застаецца без новых відэаролікаў. Ці выставілі яму абвінавачанне, блогер не паведамляе. І прычынаў затрымання не называе.
Віталь — стваральнік вобраза «деда Шоушенко», а таксама сатырычнага цыклу «Ябацькіны новасти», дзе аналізуе палітычныя падзеі ў Беларусі.
Будзе дапоўнена
