Праваабарончая праграма "Вясна" на Беларускім Радыё Рацыя
Кожны аўторак у 20:05 (паўтор у суботу ў 7:00) у эфіры незалежнай радыёстанцыі “Беларускае Радыё Рацыя” — праграма "Вясна", якая асвятляе падзеі, датычныя правоў чалавека.
Прэм'еру ў эфіры анлайн можна паслухаць праз інтэрнэт тут альбо тут (калі не адкрываецца, то карыстайцеся VPN)
Анонс праграмы на 12 кастрычніка:
Падзея: Сусветны дзень супраць смяротнага пакарання прайшоў 10 кастрычніка. Разам з праваабаронцай Дар’яй Рублеўскай узгадаем гісторыі выбітных беларускіх дзеячоў, чые жыцці абарваліся з-за смяротных прысудаў, і правядзем паралелі з сучаснасцю. А прадстаўніца Беларускага моладзевага савета “РАДА” Кацярына Буніна распавядзе, чаму тэма смяротнага пакарання можа быць цікавая для моладзі.
Каментар: Паглядзім на культурніцкую навіну скрозь прызму сучаснага кантэксту рэпрэсій. Убачыў свет палескамоўны зборнік “Оньдэ” – але яго прэзентавалі не на радзіме. Яго аўтар Аляксей Дзікавіцкі — намеснік старшыні тэлеканалу, які ўлады прызналі экстрэмісцкім. Рэдактарка зборніка Валярына Кустава згубіла свае напрацоўкі праз канфіскаваны сілавікамі кампутар. А Піншчына — месца носьбітаў палескай гаворкі і месца, дзе дзясяткі людзей асудзілі па так званай “пінскай справе”.
Асоба: “Ён ішоў на гэта, узважыўшы свой крок”. Пра палітзняволенага старшыню “Вясны” Алеся Бяляцкага распавядае сяброўка арганізацыі Алена Лапцёнак.
У музычных паўзах – творы з музычнага праекту “(Не)расстраляная паэзія”, героямі якога сталі беларускія пісьменнікі, расстраляныя у 1937 годзе, а сучасныя музыкі на іх вершы стварылі свае кампазіцыі.
*Аўдыёзапіс выпуску:
