Суд пастанавіў спагнаць з "Народнай волі" 15 мільёнаў рублёў на карысць Сяргея Атрошчанкі

Як паведаміла прэс-служба ГА “Беларуская асацыяцыя журналістаў”, 15 мільёнаў рублёў у якасці кампенсацыі маральных стратаў прадпрымальніка Сяргея Атрошчанкі пастанавіў спагнаць з рэдакцыі "Народнай волі" суд Ленінскага раёна г. Мінска. Акрамя гэтага, суддзя Вера Тупік абавязала рэдакцыю на працягу двух тыдняў пасля ўступлення рашэння ў законную сілу апублікаваць зняпраўджанне звестак, распаўсюджаных у артыкуле "Какому бизнесу в Беларуси хорошо?", спагнаць з адказнікаў 165 тысяч рублёў на пакрыццё судовых выдаткаў і 700 тысяч рублёў - на аплату паслуг адваката зыскоўца. "Народная воля" збіраецца абскарджваць судовае рашэнне ў Мінскі гарадскі суд.