Блогера асудзілі да двух гадоў "хіміі" за абразу высокапастаўленага бабруйскага даішніка
Дзмітрый Цімафееў, фота 6tv.by
Суддзя Ленінскага райсуда Магілёва Натальля Панасенка прысудзіла да двух гадоў абмежавання волі ў папраўчай установе адкрытага тыпу блогера з Баранавічаў Дмітрыя Цімафеева. Яго прызналі вінаватым у абразе начальніка аддзела ДАІ Бабруйскага гарвыканкама Віталя Паддубскага, паведамляе 6tv.by.
Акрамя крымінальнага пакарання, Цімафееў павінен будзе выплаціць кампенсацыю па заяўленым Паддубскім грамадзянскім пазове аб кампенсацыі маральнай шкоды ў памеры 1 тыс. рублёў. Пры гэтым суддзя пакінула без разгляду патрабаванне высокапастаўленага даішніка аб канфіскацыі з усеагульнага доступу каментара Цімафеева, размешчанага ў YouTube-канале 6tv.by, а таксама патрабаванне аб прабачэнні ад блогера.
Адзначым, што суддзя вынесла прысуд, цалкам адпаведны патрабаванню пракурора.
Дзмітрый Цімафееў заявіў аб намеры абскардзіць вердыкт суда.
Згодна з матэрыяламі справы, у чэрвені 2020 года ў сюжэце YouTube-канала 6tv.by Цімафееў, выйшаўшы з Магілёўскага абласнога суда, дзе ён абскардзіў пастановы аб арышце за нібыта ўдзел у Антыпарадзе ў Бабруйску 9 траўня, выказаў абразлівыя словы на адрас Паддубскага. Ён назваў міліцэйскага начальніка бездарам, які не ведае ПДР, і злачынцам.
Па сцвярджэнні Цімафеева, словы, якія пакрыўдзілі Паддубскага, у першую чаргу тычыліся сістэмы, дзе магчыма несправядлівае пакаранне невінаватага чалавека. Ён распавёў, што ў Бабруйску быў праездам, і хацеў у Дзень Перамогі ўскласці вянок да помніка, здымаючы гэта дзеянне для сваіх падпісчыкаў. Аднак пасля ён быў затрыманы, асуджаны на 12-дзённы арышт і перавезены ў Магілёўскі ІЧУ.
ДАІ ў сваю чаргу аштрафавала блогера за нібыта неправамерна пададзены гукавы сігнал і налепкі на аўтамабілі. Прычым зроблена гэта было, калі Цімафееў ужо быў затрыманы нібыта за ўдзел у несанкцыянаванай масавай акцыі і непадпарадкаванне патрабаванню супрацоўніка міліцыі.
Затым Цімафееў абскардзіў рашэнне бабруйскага суда ў Магілёўскім абласным судзе. Праўда, разгляд там яго яшчэ больш абурыў, паколькі не былі ўзяты пад увагу заяўлены ім відэазапіс, які сведчыць, што ён не здзяйсняў правапарушэння па лініі ДАІ.
У апошнім слове ў судзе Ленінскага раёна Цімафееў заявіў, што Паддубскі з'яўляецца толькі інструментам для помсты нейкіх іншых людзей "высокага рангу". Таксама ён паведаміў, што яму паступалі пагрозы смерцю. Падсудны папрасіў прабачэння ў Паддубскага за тое, што назваў яго злачынцам, адзначыўшы, што да яго, як да чалавека, гэта не было звернута. Цімафееў прасіў суд не караць яго.
