Факты палітычнага пераследу за 25 снежня Дапоўнена

25 снежня ў Беларусі працягваюцца розныя формы ціску на палітычных актывістаў, журналістаў і зняволеных. ПЦ "Вясна" фіксуе факты палітычнага пераследу.

Палітвязню Ігару Лосіку падоўжылі тэрмін утрымання пад вартай да 25 сакавіка. Сёння павінна было скончыцца паўгадавое зняволенне, аднак на свабоду палітвязень не выйдзе. Сам Ігар Лосік працягвае галадоўку, якую абвясціў 15 снежня. 

У Драгічыне пад хатні арышт адправілі журналіста сайта “Першы Рэгіён" Сяргея Гардзіевіча, паведамляе БАЖ. Пра гэта стала вядома 25 снежня, калі скончыліся 72 гадзіны з моманту затрымання журналіста.

Паводле інфармацыі рэдакцыі сайта, Сяргей Гардзіевіч быў затрыманы 22 снежня з удзелам супрацоўнікаў АМАПу па дарозе з Драгічына ў Брэст. Пазней у яго доме адбыўся ператрус. Затрыманне журналіста звязанае са справай, распачатай паводле артыкула 368 Крымінальнага кодэкса (“Абраза прэзідэнта Рэспублікі Беларусь”).

Сайт "Першы Рэгіён" — прыватнае медыя. Працуе для шэрагу гарадоў Брэсцкай вобласці: Івацэвічаў, Бярозы, Пінска, Ганцавіч, Драгічына.

Як паведамляе "Новы час", у Салігорску затрымалі ўдзельніка страйку на "Беларуськаліі" Андрэя Стадуба, які 24 снежня зладзіў адзіночны пікет у цэнтры горада. Мужчына выйшаў з плакатам "Стаю нахабна, мэтанакіравана".

Гэты плакат стаў адказам на выказванне кіраўніка КДБ Івана Церцеля наконт забойства Аляксандра Тарайкоўскага.

Інфармацыя будзе дапаўняцца