“Вясна” атрымала Польскую прэмію імя Сержыу Віера дзі Мелу

2020 2020-12-11T12:39:04+0300 2020-12-11T13:32:52+0300 be https://spring96.org/files/images/sources/premija_de_mello.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Асацыяцыя Віла Дэцыя дзясятага снежня ў 17-ты раз абвясціла лаўрэатаў Польскай прэміі імя Сержыу Віера дзі Мелу. У катэгорыі “Няўрадавая арганізацыя” лаўрэатам стаў Праваабарончы цэнтр “Вясна”.

premija_de_mello.jpg
Прэмія імя Сержыу Віера дзі Мелу.

Урачыстае ўручэнне адбылося ў рэжыме анлайн.

Капітулія ўзнагароды без ваганняў ведала, што “Вясна” заслугоўвае асаблівай адзнакі,  падкрэсліў Павал Радомскі, дырэктар Дэпартаменту злучаных народаў і  правоў чалавека Міністэрства замежных спраў Польшчы: 

""Вясна" ўжо амаль 25 гадоў дапамагае ахвярам рэжыму. Зараз, калі рэпрэсіі беларускіх уладаў супраць сваіх грамадзян сталі масавымі, роля “Вясны” – ключавая. Арганізацыя дзякуючы заангажаванню сваіх валанцёраў сабрала сведчанні пацярпелых і рэпрэсаваных асобаў, збірае спісы затрыманых. Асобы, якім дапамагла “Вясна”, можна лічыць у тысячах”, – адзначыў Павал Радомскі.

Павал Радомскі падчас уручэння прэміі
Павал Радомскі падчас уручэння прэміі

Старшыня ПЦ “Вясна” Алесь Бяляцкі на ўручэнні прэміі нагадаў, што ўся гісторыя “Вясны” была моцна звязана з гісторыяй Беларусі:

“Ці займаліся б мы працай па абароне правоў у Беларусі, калі б ведалі, што яна зацягнецца на 26 гадоў? Калі б ведалі, што 17 гадоў зь іх “Вясна” будзе існаваць без рэгістрацыі, што дзясяткі нашых калег будуць выкінутыя з працы, пройдуць праз суды, вобшукі, застануцца без сацыяльнага забеспячэння? Дзяржава рабіла ўсё, каб змаргіналізаваць праваабаронцаў, звесьці уплыў “Вясны” на хаду падзей у грамадзтве да нуля. Але мы ўпарта не пагаджаліся і працавалі далей. […]

І вось прыйшоў гэты час, 2020 год, калі загаварыў народ. Сотні тысяч людзей выйшлі пратэставаць супраць фальсіфікацыцяў на выбарах, супраць гвалту і патрабаваць пакараць злачынцаў, вінаватых у катаваннях. Улада захісталася, але пакуль што ўтрымалася, дзякуючы яшчэ большаму ўзроўню рэпрэсіяў і абмежаваньняў. […] У гэты складаны час праца “Вясны” аказалася як ніколі патрэбнай. У апошнія месяцы да нас прыйшлі сотні валанцёраў”.

Прэмія імя Сержыў Віэйрэ ді Меллу

Алесь Бяляцкі таксама перадаў гарачыя прывітанні тым, хто атрымаў таксама 17-ую прэмію імя Сержыу Віера дзі Мелу: гэта Хусейн Каро Ібрахім Альгаідзі, абаронца езідаў у Курдыстане, а таксама вязень Аўшвіца і Бухенвальду Марыян Турскі.


Сержыу Віера дзі Мелу быў бразільскім дыпламатам і Высокім Камісарам па правах чалавека ААН у 2002—2003 гг. Загінуў у выніку выбуху будынка ААН у Багдадзе 19 жніўня 2003 года.

Апошнія навіны

Партнёрства

Сяброўства