За абразу начальніка мінскага АМАПу Балабы студэнта асудзілі на паўтары гады "хіміі"

Суд Фрунзенскага раёна разглядзеў крымінальную справу па арт. 369 Крымінальнага кодэкса ў дачыненні да 19-гадовага студэнта МДЛУ Іллі Тананкі за абразу палкоўніка міліцыі, начальніка АМАПу Мінска Дзмітрыя Балабы. Хлопца абвінавацілі ў тым, што ён напісаў на сцяне дома па вуліцы Скрыпнікава, дзе пражывае пацярпелы,"Балаба – забойца", чым публічная абразіў прадстаўніка ўлады ў сувязі з выкананнем ім службовых абавязкаў. Суддзя Андрэй Млечка 26 лістапада пакараў хлопца паўтара гадамі абмежавання волі з накіраваннем у выпраўленчую ўстанову адкрытага тыпу. Таксама суд абавязаў студэнта выплаціць тысячу рублёў кампенсацыі за маральную шкоду.

Ілля Тананка ў судзе. Фота: TUT.BY

У чым абвінавацілі студэнта?

Па матэрыялах справы, студэнт "публічна абразіў супрацоўніка АМАПу, прычыніў шкоду гонару і годнасці, апусціў аўтарытэт супрацоўніка ў вачах навакольных, падарваў прэстыж кіраўніцкай дзейнасці ў дзяржаве, якая ажыццяўляецца супрацоўнікамі АУС, нанёсшы шэраг надпісаў з негатыўнай ацэнкай на адрас палкоўніка міліцыі Дзмітрыя Балабы".

Хлопец пакінуў надпісы на аб'явах, якія размешчаны на інфармацыйных стэндах каля пад'ездаў. Па яго словах, ён разумеў, што гэта абраза, але хацеў выказаць сваё меркаванне.

Нагадаем, трох студэнтаў, у тым ліку Іллю, затрымалі 26 верасня. ГУУС Мінгарвыканкама паведаміла тады:

"Трое студэнтаў прыйшлі "паглядзець" на дом па вуліцы Скрыпнікава, даведаўшыся з інтэрнэту, што машына і фасад дома міліцыянта размаляваныя пагрозлівымі і абразлівымі надпісамі. Потым яны захацелі пакінуць свае надпісы на стэндзе пад'езда".

З затрыманымі хлопцамі знялі традыцыйнае пакаяльнае відэа, дзе з імі, у тым ліку, размаўляў Дзмітрый Балаба.

Ілля распавёў на судзе, што паказанні ў РУУС Фрунзенскага раёна яны давалі 27 верасня пасля таго, як правялі ноч у камерах, дзе немагчыма было спаць.

Калі трох хлопцаў затрымалі, у службовым аўто Балаба правёў з імі тлумачальную гутарку, потым маладых людзей адвезлі ў РУУС, а Ілля публічна папрасіў прабачэння перад Балабай і іншымі супрацоўнікамі міліцыі. У той жа дзень яны атрымалі па 15 сутак па артыкуле 23.4 КаАП (Непадпарадкаванне законнаму распараджэнню ці патрабаванню службовай асобы пры выкананні ім службовых паўнамоцтваў).

Адказваючы на пытанне пракурора, ён паведаміў, што яго адпусцілі з ІЧУ 11 кастрычніка, ён увесь гэты час знаходзіўся там па рашэнні суда за непадпарадкаванне супрацоўнікам міліцыі.

Што казаў студэнт на судзе?

Ілля Тананка сваю віну прызнаў і заявіў у судзе, што ўсведамляў, што рабіў абразу Балабы. Ён сказаў, што публічныя прабачэнні Балабе ён прынёс на наступны дзень. 

Абвінавачаны Ілля распавёў у судзе, што 26 верасня сустрэўся з сябрамі, яны абмяркоўвалі навіны, што на фасадзе дома, дзе жыве Дзмітрый Балаба, з'явіліся абразлівыя надпісы, а яшчэ хтосьці пашкодзіў яго машыну.

Адрас хлопцы знайшлі ў адным телеграм-канале. Калі яны пайшлі паглядзець, то аднаму з хлопцаў у кампаніі прыйшла ідэя таксама "пакінуць пасланне".

"Я быў абураны дзеяннямі супрацоўнікаў праваахоўных органаў, у тым ліку збіццё пратэстуючых, быў абураны перакрыццем працы метро. Ён з'яўляецца кіраўніком АМАПа, дзеянні адбываюцца пад яго кіраўніцтвам. Астатнія надпісы былі хутчэй воплескам эмоцый", — патлумачыў свае дзеянні Ілля.

Той самы абражальны надпіс. Скрыншот з відэа МУС

Якая пазіцыя па справе пацярпелага начальніка сталічнага АМАПу?

У пачатку судовага было зачытана хадайніцтва пацярпелага Дзмітрыя Балабы разглядаць справу ў судзе ў яго адсутнасці з-за хваробы. Камандзір АМАПу папрасіў спагнаць з абвінавачанага 1000 рублёў за нанясенне яму маральнай шкоды.

У сувязі з тым, што пацярпелы адсутнічаў на судовым паседжанні, былі зачытаныя яго паказанні, дадзеныя падчас следства:

"26.09.2020 каля 21 гадзіны я прыехаў дадому, пры гэтым, заходзячы ў пад'езд, я не звяртаў увагі на інфармацыйны стэнд, размешчаны на пад'ездзе майго дома. Дома знаходзіўся са сваімі роднымі. Каля 22.50 гадзін 26.09.2020 мне на мабільны тэлефон патэлефанавалі супрацоўнікі праваахоўных органаў. Хто менавіта — у цяперашні час назваць не магу, бо не памятаю. Супрацоўнік растлумачыў, што ўнізе майго дома нарадам міліцыі затрыманыя трое маладых людзей, якія наносілі абразлівыя надпісы на інфармацыйным стэндзе майго пад'езда".

Пасля гэтага Балаба спусціўся, вырашыў пагаварыць са студэнтамі, даведацца, чым выклікана іх паводзіны і іншае. Тады ж ён убачыў надпісы на аб'явах — ён палічыў іх абразлівымі для сябе і праваахоўнай сістэмы ў цэлым.

Ілля Тананка. Скрыншот з відэа МУС

Пакаранне

Ілля Тананка спецыяльна адкрыў разліковы рахунак на той выпадак, калі пакаранне будзе ў выглядзе штрафу і кампенсацыі маральнай шкоды. Паводле яго словаў, сваякі папоўнілі гэты рахунак. Так Ілля сабраў суму ў памеры 100 базавых велічынь (2700 рублёў), гэтую суму ён гатовы быў пагасіць адначасова.

Пасля перапынку 25 лістапада абвінавачаны перавёў тысячу рублёў на дэпазіт суда.

Дзяржабвінаваўца запрасіла для студэнта пакаранне ў выглядзе абмежавання волі з накіраваннем у выпраўленчую ўстанову адкрытага тыпу на паўтара года. Таксама яна лічыць неабходным задаволіць грамадзянскі пазоў Балабы аб кампенсацыі шкоды. Суддзя Андрэй Млечка падтрымаў прапанову пракурора і пакараў Іллю Тананку 1,6 года "хіміі", а таксама абязаў выплаціць тысячу рублёў за маральную шкоду.