Панядзелак пачынаецца з ператрусу. Хроніка пераследу 9 лістапада Дапоўнена

У панядзелак дзевятага лістапада ў Беларусі працягваецца пераслед людзей па палітычных матывах. Праваабаронцы "Вясны" кожны дзень збіраюць факты пераследу па ўсёй краіне: затрыманні, вобшукі і іншыя формы ціску.

У Слоніме адбываецца ператрус ў доме галоўнай рэдактаркі недзяржаўнай “Газеты Слонімскай” Ганны Валадашчук. Як піша "Беларуская асацыяцыя журналістаў", ператрус праводзіцца ў адпаведнасці з санкцыяй пракурора ў сувязі з тым, што ў мясцовых тэлеграм-каналах з’яўляліся паведамленні з абразамі.

Ганна Валадашчук

Ганна Валадашчук у размове з прадстаўнікамі Беларускай асацыяцыяцыі журналістаў падкрэсліла, што не мае дачынення ні да якіх тэлеграм-каналаў і паклёпніцкіх паведамленняў. Падчас ператрусу ў яе запытваліся пра тэлеграм-канал "Слонім для жыцця": хто яго мадэруе, хто фінансуе. У доме Ганны міліцыянты забралі два кампутары, sim-карты, флэш-накапляльнікі. Пасля ператрусу дома работнікі міліцыі без папярэджання прыехалі ў рэдакцыю "Газеты Слонімскай". У рэдакцыі таксама забралі кампутары ў журналістаў, бухгалтэрыі, у рэкламным аддзеле.

Раніцай Ганну па позве выклікалі ў міліцыю, пасля гэтага да яе дамоў прыйшлі з ператрусам. Як паведаміла Ганна Валадашчук, у міліцыі яна дазналася, што ператрус 9 лістапада праводзіўся і ў іншых слонімскіх актывістаў. Верагодна, міліцыянты шукаюць датычных да тэлеграм-канал "Слонім для жыцця".

Мінск

Пасля традыцыйнага Марша пенсіянераў у Мінску была затрыманая адна студэнтка. Яе прозвішча высвятляецца.

У Мінску на на гутарку ў РУУС выклікалі спявачку і паэтку Кацярыну Ваданосаву. Яна засцерагаецца затрымання.

Так, пасля выкліку ў Заводскі РУУС не выйшла на волю 24-гадовая Наталля Пляшкун.

"Пайшла ў Заводскі РУУС па позве другі раз — затрымалі. Мяркуючы па ўсім шыюць некалькі пратаколаў па 23.34 КаАП, першы суд павінен быць 13.11 у Заводскім судзе", — паведмляюць блізкія дзяўчыны.

У межах крымінальнай справы па арт. 342 Крымінальнага кодэксу "Марш супраць тэрору" ў Мінску 9 лістапада затрымалі Сяргея Вычужаніна. Раней паведамлялася, што па гэтай крымінальнай справы прызнаны 231 падазраваны, іх затрыманне працягваецца.

Інфармацыя дапаўняецца і дапаўняецца.