Каля будынка Савецкага суду міліцыя затрымала актывістаў Міхаіла Пашкевіча і Андрэя Ігнатовіча
У судзе Савецкага раёна Менска праходзіць працэс па справе актывістаў “Маладога Фронту”. Каля будынка суду на Лагойскім тракце цяпер знаходзяцца каля 200 чалавек. Людзі трымаюць у руках партрэты падсудных, плакаты. Моладзевыя актывісты скандуюць: “Свабоду!”, “Жыве Беларусь!”.
У залу суду пусцілі толькі адвакатаў, журналістаў і прадстаўнікоў замежных амбасад. Будынак ачэплены супрацоўнікамі палка міліцыі спецыяльнага прызначэння (былы АМАП).
Як стала вядома ПЦ “Вясна”, прыкладна ў 12-20 міліцыя затрымала актывістаў Міхаіла Пашкевіча і Андрэя Ігнатовіча (партыя моладзі БНФ), якія адыйшліся ад будынку суду.
Нагадаем, што крымінальная справа супраць Змітра Хведарука, Барыса Гарэцкага, Алега Корбана, Аляксея Янушэўскага, і Насты Палажанкі ўзбуджаная за дзейнасць ад імя незарэгістраванай арганізацыі па артыкуле 193-1 КК РБ.
