Гомельскіх актывістаў за салідарнасць з Украінай пакаралі арыштам
Будынак суду Цэнтральнага р-ну Мінску
11 сакавіка актывісты "Маладога фронту" з Гомеля Стас Була і Зміцер Карашкоў каля 11.40 падыйшлі да расійскай амбасады ў Мінску з плакатамі "Пуцін, рукі прэч ад Украіны" і "Не вайне! Пуцін - вораг". Літаральна праз 1.5 хвіліны хлопцаў затрымалі і адвезлі ў Цэнтральны РАУС. Па словах актывістаў, уся паркавая зона каля расійскай амбасады застаўленая міліцыянтамі.
У РАУС на іх склалі пратакол аб адміністратыўным правапарушэнні - за непадпарадкаванне законнаму распараджэнню ці патрабаванню службовай асобы дзяржаўнага органа пры выкананні ім службовых паўнамоцтваў (арт. 23.4 КаАП РБ).
Учора каля 15 гадзінаў адбылося разбіральніцтва справы ў судзе Цэнтральнага раёну. Справу разглядала суддзя Вікторыя Шабуня. Сведкамі выступілі міліцыянты са службы аховы амбасады Быкаў і Берасневіч. Рашэнне суда - 11 сутак арышту далі Станіславу Булы, 15 сутак арышту - Зміцеру Карашкову. Падчас судовага разбіральніцтва хлопцы заяўлялі, што ў выпадку адміністратыўнага пакарання яны абвесцяць галадоўку.
