Да 21 траўня палітзьняволены Павал Севярынец будзе знаходзіцца ў адпачынку
16 траўня палітык выехаў з вёскі Малое Сітна, дзе адбывае пакараньне за арганізацыю вулічных дэманстрацыяў пратэсту супраць фальсіфікацыі вынікаў выбараў і рэферэндуму 2004 году, у Віцебск. У сьпецкамендатуры паведамілі, што на працу ён мусіць выйсьці 21 траўня.
Чарговы адпачынак для “палітхіміка” мусіў пачацца 8 траўня. Атрымаўшы дазвол, ён паехаў таго дня да бацькоў, але неўзабаве, на загад сьпецкамендатуры, мусіў вярнуцца на месца адбыцьця пакараньня.
Паводле Паўла, улады палічылі за лепшае не даваць яму адпачынку напярэдадні Дня перамогі, паведаміла Радыё Свабода.
Больш ад астатніх з тае нагоды абураўся дзед палітыка, Павал Севярынец. Павал Пятровіч — інвалід вайны. У 1944 годзе, падчас баёў за вызваленьне Беларусі, ён атрымаў цяжкое раненьне і вярнуўся з фронту без нагі. Цяпер Паўлу Севярынцу 83 гады. Ён жыве ў вёсцы Ўнорыца Рэчыцкага раёну і перажывае за лёс унука.
