Суды над Вінцуком Вячоркам і Вячаславам Сіўчыкам завяршыліся іх вызваленьнем ад адміністратыўнай адказнасьці

Судзьдзя Савецкага раёну Менску Людміла Савасьцян пасля перапынку абвясьціла прысуд па адміністратыўнай справе старшыні партыі БНФ Вінцука Вячоркі. Ен быў прызнаны віноўным у дробным хуліганстве, але з-за малазначнасці правапарушэньня вызвалены ад адміністратыўнай адказнасьці.

Нагадаем, што пасьля пачатку судовага паседжаньня падсудны выказаў недавер судзьдзі, аргумэнтаваўшы заяву тым, што Людміла Савасьцян шмат разоў выносіла палітычна матываваныя прысуды актывістам апазыцыі, у тым ліку і яму. Пры гэтым Вінцук Вячорка падкрэсьліў, што асабліва вызначылася Людміла Савасьцян у часе судоў над удзельнікамі сакавіцкіх падзеяў 2006 году, таму яе імя не выпадкова значыцца ў сьпісе беларускіх чыноўнікаў, якім забаронены ўезд у краіны Эўрапейскага Зьвязу.

Аднак пасля кароткага перапынку Людміла Савасьцян адхіліла адвод і працягнула судовыя слуханьні. Паказаньні супраць Вінцука Вячоркі давалі супрацоўнікі палка міліцыі спецыяльнага прызначэньня Чычко і Супрун.

У той жа час яна адхіліла хадайніцтва адваката Вячоркі заслухаць паказаньні Франака Вячоркі і камандзіраў сьведкаў – байцоў спэцназу міліцыі.

Нагадаем, што суды павінны былі адбыцца 23 сакавіка. Аднак паколькі Вячорка на той момант хварэў, суд над ім быў перанесены на 4 красавіка. На гэты ж дзень быў прызначаны суд над Сіўчыкам, які нібыта спазьніўся на судовае пасяджэньне і таму суддзя прыняла рашэньне аб пераносе разгляду справы на красавік.

Яшчэ 13 сакавіка на Вінцука Вячорку складзены пратакол за дробнае хуліганства (нібыта нецэнзурна лаяўся у пад’едзе). На думку праваабаронцаў, затрыманьне і суд над Вінцуком Вячоркам носяць яўна палітычны характар.

У дробным хуліганстве звінавацілі таксама і Вячаслава Сіўчыка. Суддзя Савецкага суду Менска Аксана Рэлява паўтарыла “саламонава” рашэньне Савасцян і прызнаўшы Сіўчыка вінаватым у дробным хуліганстве, вызваліла яго ад адміністратыўнай адказнасьці ў сувязі з нязначнасьцю здзейсьненага правапарушэньня.