Баранавічы: Вышэйшы гаспадарчы суд разгледзіць касацыйную скаргу Мікалая Чарнавуса
Баранавіцкі прадпрымальнік і грамадскі актывіст Мікалай Чарнавус атрымаў ліст з Вышэйшага гаспадарчага суда, у якім паведамляецца, што разгляд яго касацыйнай скаргі адбудзецца 13 лістапада.
Вось ужо амаль цэлы год Мікалай Чарнавус імкнецца апратэставаць вынікі выбараў Рады індывідуальных прадпрымальнікаў на Баранавіцкім каапрынку ў судовых інстанцыях. Ён сцвярджае, што сябры Рады былі прызначаны адміністрацыяй каапрынка, а не абраны на агульным сходзе індывідуальных прадпрымальнікаў, як гэта патрабуе заканадаўства краіны.
– Гаспадарчы суд Брэсцкай вобласці 09.08.2012 года адмовіў мне ў задавальненні зыскавых патрабаванняў да адміністрацыі Баранавіцкага каапрынку. Пастановай апеляцыйнай інстанцыі гэтага ж суда ад 04.09.2012г. рашэнне гаспадарчага суда першай інстанцыі было пакінута без зменаў. Таму я звярнуўся ў Вышэйшы гаспадарчы суд, каб усё ж такі знайсці праўду і даказаць, што выбары Рады індывідуальных прадпрымальнікаў на Баранавіцкім каапрынку ў снежні 2011 года былі несумленнымі і незаконнымі, – паведаміў Мікалай Чарнавус.
