Папярэджанне, каб не праводзіў пікет, віцебскі актывіст атрымаў сярод ночы
Мінулым вечарам у інтэрнат, дзе жыве Аляксандр Кірылаў, прыйшла прадстаўніца аддзела ідэалогіі Кастрычніцкага раённай адміністрацыі. Было гэта пасля 22-х гадзінаў, і хлопец спачатку не хацеў пускаць чыноўніцу ў сваё жытло. Але яна настойвала і папракала Кірылава тым, што ён паскардзіўся на яе ў пракуратуру.
Аляксандр Кірылаў, сябра незарэгістраванай Беларускай Кансерватыўна-Хрысціянскай партыі "Белая Русь", атрымаў нарэшце пісьмовае папярэджанне ад уладаў:
"Спадарыня літаральтна ўварвалася да мяне ў пакой, кінула паперу. І пачала абурацца, чаму я паскардзіўся на яе ў абласную пракуратуру. А што мне заставалася рабіць, калі ўдзень мне тэлефануе нейкая невядомая асоба, называе сябе прадстаўніцай райвыканкаму, і заяўляе, што мяне арыштуе міліцыя, ледзьве толькі я з'яўлюся ў цэнтры Віцебску з намерам правесці пікет".
Кірылаў збіраўся правесці ў цэнтры Віцебску аднаасобны пікет супраць беспрацоўя, бо лічыць, што яго незаконна знялі з уліку ў абласным цэнтры занятасці. На гэтую ўстанову ён падаў скаргу ў суд.
"Гэта наша тактыка: падаваць у суд, калі ёсць праблемы, якія мы лічым абумоўленымі цяперашняй дзяржаўнай палітыкай", -- дадаў кіраўнік Беларускай Кансерватыўна-Хрысціянскай партыі "Белая Русь", былы ўдзельнік мінулай прэзыдэнцкай кампаніі Сяргей Рыжоў.
Замест пікета з удзелам Аляксандра Кірылава, за перасоўваннямі якога па горадзе сёння сачыла віцебская міліцыя, Сяргей Рыжоў вырашыў асабіста распаўсюджваць улёткі с уласным артыкулам "Галасуй за ягоную Беларусь, а то прайграеш". У артыкуле гаворыцца пра тое, што Беларусь – адзіная краіна ў Еўропе, дзе існуе смяротнае пакаранне, што тут фальсіфікуюць выбары, збіваюць і саджаюць у турмы кандыдатаў ў прэзідэнты, не дазваляюць грамадзянам праводзіць акцыі пратэсту.
Фота: 1. Аляксандр Кірылаў
2. Сяргей Рыжоў раздае ўлёткі віцебскім мінакам
