Дэпутату Вілейскага райсавету адмовілі ў правядзенні пікету
Дэпутат Вілейскага раённага Савета дэпутатаў Іосіф Маціюн атрымаў адмову ў правядзенні пікета супраць парушэння ягоных канстытуцыйных правоў, якраз на Дзень канстытуцыі, паведамляе сайт Vialejka.org.
Старшыня Вілейскага райвыканкама ў адказе дэпутату заявіў, што гарадскі парк не з'яўляецца месцам правядзення масавых мерапрыемстваў. Але раней на гэтым самым месцы праводзілі мерапрыемствы супрацоўнікі раённага аддзелу Міністэрства па надзвычайных сітуацыях і Міністэрства ўнутраных спраў.
Апроч таго, у якасці падставы для адмовы старшыня райвыканкаму адзначае той факт, што ў сваім звароце Іосіф Маціюн не патлумачыў, як ён збіраецца арганізоўваць у парку меры грамадскага парадку і бяспекі, а таксама медыцынскае абслугоўванне.
Нагадаем, што з сябрам Беларускай партыі левых “Справядлівы свет” Іосіфам Маціюном, які працаваў настаўнікам гісторыі ў Вілейскай гімназіі №2, не працягнулі кантракт з-за яго грамадзянскай пазіцыі і гулянняў на Цэнтральнай плошчы па серадах.
