Гомель: удзел у масоўцы за добрыя адзнакі

У Гомелі 14-15 лютага праходзіць міжнародны турнір па гандболу. 15 лютага на матчы «Беларусь-Расія», які адбыўся ў 18.00 у Палацы гульнявых відаў спорту прысутнічалі каля тысячы чалавек. Як скардзіліся гледачы, у асноўным маладыя людзі, і нават падлеткі, на матч яны прыйшлі далёка не з-за любові да гандболу. Па словах навучэнцаў Гомельскага дзяржаўнага машынабудаўнічага ліцэю, ім загадалі ў абавязковым парадку быць на матчы выкладчыкі навучальнай установы, паабяцаўшы ў выніку падпарадкавання добрыя адзнакі і адсутнасць праблем.

Такім жа чынам, напэўна, прысутнічалі на гандбольным матчы і навучэнцы гандлёвага каледжу, ужо не кажучы пра курсантаў інжынернага інстытута МНС.

Падтрымаць беларускую каманду міжвольныя аматары прыйшлі не з пустымі рукамі, а са сцягамі, якія ім раздалі адказныя выкладчыкі.

Дарэчы, матч «Беларусь – Расія» завяршыўся ў нічыю.