Баранавіцкія ўкраінцы падалі заяву на правядзенне пікету “Чыноўнікі супраць дружбы між народамі”

Напярэдадні Новага года старшыня Баранавіцкага грамадскага аб’яднання “Кабзар” Мікола Чарнавус (на фота) падаў заяву на пікет 25 cтудзеня з мэтай праінфармаваць грамадскаць горада аб тым, што гарадскія ўлады адмаўляюцца выдзяліць памяшканне для юрыдычнага адрасу арганізацыі. Не маючы памяшкання пад юрыдычны адрас, баранавіцкія ўкраінцы (а іх у горадзе 1210 чалавек) не могуць зарэгістраваць сваё грамадскае аб’яднанне. Раней мы паведамлялі, што Камунальнае ўнітарнае рамонтна-эксплуатацыйнае прадпрыемства “ЖРЭУ г. Баранавічы” у сувязі з “вытворчай неабходнасцю” адклікала гарантыйны ліст ад 21.03.2011 года аб прадастаўленні баранавіцкаму ГА “Кабзар” памяшкання для офіса ў пяць квадратных метраў па вул. Савецкая, д.60.

- Каб атрымаць памяшканне, цяпер нам прапануюць удзельнічаць ў аўкцыёне і плаціць шалёныя грошы. Напрыклад, у горадзе Севастопалі беларускія грамадскія арганізацыі арандуюць памяшканне ў 100 кв.метраў усяго за 1 (адну!!!) грыўну (гэта адзін праезд у нашым гарадскім аўтобусе). Ну а нам прапаноўваюць удзел ў аўкцыёне, дзе памяшканне каштуе больш за 10 мільёнаў рублёў. Зразумела, што ў нас такіх грошай няма. Таму, арганізуючы пікет, мы хочам выказаць пратэст супраць бюракратызма чыноўнікаў, якія ведаюць, што вольныя плошчы для офісаў ёсць у Баранавічах, але гэтыя бюракраты не прадстаўляюць іх для недзяржаўных грамадскіх аб’яднанняў,- патлумачыў Мікалай Чарнавус.