Суды над прэвентыўна затрыманымі перад Народным сходам пераносяць
У судзе Мінскага раёна і горада Заслаўя пачаўся разгляд адміністратыўнай справы Ігара Трухановіча, прэвентыўна затрыманага ў дзень Народнага сходу 8 кастрычніка. Да суду затрыманага трымалі ў ізалятары на вуліцы Скарыны.
Справу разглядала суддзя Мініч. З-за няяўкі міліцыянтаў, якія мусілі выступаць у якасці сведкаў па справе, судовае паседжанне перанесена на 13 кастрычніка.
У Баранавічах меўся адбыцца суд над Анжэлай Камбалавай за распаўсюд улётак пра Народны сход. Але суд быў перанесены на 17 кастрычніка, бо суддзя Іна Паўлоўская заявіла, што ў яе шмат іншых справаў, перадае “Еўрапейскае радыё”.
У Мёрах судзяць журналіста рэсурсу www.westki.info Кастуся Шыталя, якога затрымалі 7 кастрычніка па дарозе з Глыбокага ў Дзісну. Судовае рашэнне па гэтай справе таксама будзе вынесенае 17 кастрычніка. Журналіста абвінавачваюць у дробным хуліганстве (арт. 17.1 КаАП) — нецэнзурнай лаянцы пры затрыманні.
