Жыхары Брэста атрымалі ўлёткі «Свабоду Алесю Бяляцкаму!»
«Свабоду праваабаронцу Алесю Бяляцкаму!» – з такім заклікам брэсцкія праваабаронцы Уладзімір Малей і Юры Жыдовіч раздалі ўлёткі з інфармацыяй пра дзейнасць Алеся Бяляцкага і абвінавачванні ў яго адрас з боку беларускай улады.
Алесь Бяляцкі падазраецца ва ўхіленні ад уплаты падаткаў і збораў у асабліва буйным памеры. На дадзены момант праваабаронца знаходзіцца ў ізалятары на Валадарцы.
Брэсцкі праваабаронца Юры Жыдовіч мяркуе, што такія акцыі маюць добры вынік:
- Гэтую акцыю салідарнасці з арыштаваным Алесем Бяляцкім натхніла супрацьпраўнае і антыгуманнае стаўленне да праваабаронцаў з боку нашай улады. Прынамсі некалькі дзясяткаў чалавек убачыць гэтую інфармацыю і хаця б задумаюцца над гэтай праблемай.
Лідару праваабарончага цэнтра «Вясна» Алесю Бяляцкаму пагражае пазбаўленне волі да 7 гадоў.
