Маці абвінавачанага ў тэракце не дазволілі быць законным прадстаўніком сына
У адмове (на фота) за подпісам кіраўніка следчай групы, якая займаецца расследваннем выбуха ў мінскім метро, намесніка Генеральнага пракурора Рэспублікі Беларусь Андрэя Шведа напісана, што маці не дазволілі быць законным прадстаўніком сына, бо ён поўнагадовы і дзеяздольны.
Маці аднаго з абвінавачаных па справе выбуху ў мінскім метро 11 красавіка занепакоеная фізічным і маральным станам свайго 26-гадовага сына, які знаходзіцца ў СІЗА КДБ. Таму спадарыня хацела, каб яе дапусцілі да ўдзелу ў дзеяннях па крымінальнай справе, распачатай супраць яе сына паводле ч.3 артыкула 289 Крымінальнага кодэксу. Яна лічыць сына невінаватым і непакоіцца, што на яго можа быць аказаны ціск, каб ён узяў на сябе віну за, чаго не рабіў.
На падставе шэрагу артыкулаў Крымінальна-працэсуальнага кодэксу, якія рэгламентуюць магчымасці грамадзян быць законнымі прадстаўнікамі сваіх бліжэйшых сваякоў, якіх вінавацяць у крымінальных злачынствах, у тым ліку асабліва небяспечных для грамдскасці, яна звярнулася з заявай да кіраўніка следчай групы. Але атрымала адмову на падставе таго, што яе сын поўнагадовы і што “у органа папярэднага расследвання няма звестак і падставаў меркаваць, што ён недзеяздольны”.
Сітуацыю каментуе віцебскі праваабаронца Павел Левінаў:
- Асоба ў статусе законнага прадстаўніка сапраўды можа прадстаўляць інтарэсы толькі непоўнагадовага або недзеяздольнага чалавеку, што і патлумачыў у сваім адказе кіраўнік следчай групы Андрэй Швед. Маці абвінавачанага маглі б дапусціць да ўдзелу ў дзеяннях па крымінальнай справе сына ў якасці абаронцы, як прадугледжана часткай 3 артыкула 44 Крымінальна-працэсуальнага кодэкса. Але хадайніцтва пра гэта мусіць падаць у орган расследвання сам абвінавачаны. Паколькі ў нас у Беларусі ў большасці насельніцтва недастаткова высокі ўзровень прававой культуры, у мяне ёсць падставы меркаваць, што 26-гадовы хлопец з сярэдняй прафесійнай адукацыяй наўрад ці ведае пра такое сваё права. Але абвінавачанаму ў абавязковым парадку мусіў патлумачыць ягоныя правы орган, які вядзе следства. Мог бы падказаць зрабіць гэта і прафесійны адвакат. Я перакананы, што ўдзел блізкага сваяка ў якасці абаронцы – гэта дужа важна, бо ні адзін адвакат не будзе так шчыра і аддана адстойваць інтарэсы абвінавачанага, як родны чалавек.
“Праваабарончая хроніка”
