Уладзімір Лапцэвіч абскарджвае выстаўлены рахунак за харчаванне ў ІЧУ
З ІЧУ выйшаў на волю журналіст БелаПАН Уладзімір Лапцэвіч
Журналіст БелаПАН Уладзімір Лапцэвіч просіць начальніка ізалятара часовага ўтрымання УУС Магілёўскага аблвыканкама спадара Краснова правесці пераразлік рахунка за харчаванне, які быў выстаўлены яму за знаходжанне ў ізалятары.
“Па выхадзе 1 красавіка на волю з ізалятара мне быў выдадзены рахунак на кампенсацыю выдаткаў за харчаванне за час адбывання адміністрацыйнага арышта з 26 сакавіка па 1 красавіка ў памеры 28 тысяч рублёў, - гаворыць Уладзімір Лапцэвіч, - аднак, у гэты перыяд я харчаваўся толькі двойчы – увечары 29 сакавіка і ўвечары 31 сакавіка”.
Уладзімір адзначае, што ягоны арышт прыйшоўся на праваслаўны пост. Паводле паста якраз 29 і 31 сакавіка ўвечары дазвалялася харчавацца варанай ежай, і ён скарыстаўся гэтай магчымасцю. Ва ўсе астатнія дні ад прыёма ежы журналіст адмаўляўся, аб чым пазначаў у ведамасцях, якія яму прыносілі пад подпіс супрацоўнікі ІЧУ.
Праваабаронца Барыс Бухель адзначае, што няправільна выстаўлены рахунак за харчаванне ў выпадку адмовы ад прыёма ежы неабходна абскарджваць.
“Рахункі павінны выстаўляцца за фактычнае харчаванне. Калі адміністрацыя ізалятара выстаўляе рахунак за ўвесь час знаходжання, а чалавек не харчаваўся, то гэта незаконна”, - гаворыць праваабаронца.
“Праваабрончая хроніка”
