Зінаіда Міхнюк ператрусу пазбегла

Ператрус у Берасьці на кватэры прафсаюзнай актывісткі Зінаіды Міхнюк, пра які паведамлялі электронныя СМІ 10 студзеня, так і не адбыўся.  Следчым не ўдалося знайсьці ў гэты дзень ні гаспадыні, ні гаспадара, а выбіваць дзверы ў кватэру яны не наважыліся. Аднак верагоднасць таго, што аператыўнікі не адмовяцца ад свайго рашэньня – высокая.

Нагадаем, што ўчора ў Берасьці адбыліся ператрусы ў пяці брэсцкіх актывістаў дэмакратычных сіл. Праваахоўнікі праходзілі да Арцёма Церашонкі, сябра ініцыятыўных груп кандыдатаў у прэзідэнты Раманчука і Някляева, да Зміцера Шурхая, даверанай асобы экс-кандыдата Рымашэўскага, да актывістаў дэмсіл Юрыя Бакура і Андрэя Шарэнды, актывіста АГП Уладзіміра Вуека.