У Воршы - новы незалежны інтэрнэт-рэсурс
Старонка http://orsha.eu працуе з 5-га лістапада. Рэдактар сайта Ігар Казмярчак распавядае пра мэты і планы новага інтэрнэт-рэсурсу.
На думку Ігара Казмерчака, новы сайт будзе актыўна наведвацца, бо ў Воршы няма незалежных друкаваных выданняў:
— Раней у нас працавала адзіная інтэрнэт-старонка — http://orsha.belarda.org —
дзе размяшчалася інфармацыя пра неафіцыйныя навіны, у першую чаргу тыя,
якіх не прачытаеш у дзяржаўнай прэсе. Колькасць наведнікаў іншы раз
перавышала 400 чалавек у дзень, і мы зразумелі: прыйшоў час ствараць
новую «каманду» для новага сайту — каб у чытачоў было больш
магчымасцяў пазнёміцца з жыццём рэгіёна. У рэдакцыі цяпер таксама
магчымасцяў пабольшала: на новым сайце можна будзе размяшчаць не толькі
друкаваныя матэрыялы, але таксама фота і аўдыёзапісы.
Старонка http://orsha.eu — гэта аршанскі рэгіянальны партал. Паводле Ігара Казмерчака, тут будуць размяшчацца навіны пра падзеі на Аршаншчыне, а таксама ў бліжэйшых раёнах — Дубровенскім і Талчынскім.
Сайт пакуль што дзвюхмоўны, для ахвотных чытаць па-руску і па-беларуску. З цягам часу рэдакцыя мяркуе дадаць і англамоўную версію.
