Барысаў: Паседжанне раённага выбаркама перанесена
Запланаванае на сёння паседжанне Барысаўскай раённай выбарчай камісіі, на якім павінна адбыцца афіцыйная рэгістрацыя кандыдатаў у дэпутаты мясцовых Саветаў 26-га склікання, нечакана перанесена з 17 на 18 гадзін. Магчыма, гэта рашэнне не звязана з святкаваннем у Менску Дня Волі.
Асноўная інтрыга гэтага паседжання - ці будзе зарэгістраваны ў якасці кандыдата раённага Савета вылучаны шляхам збору подпісаў дэмакратычны актывіст Зміцер Бабіцкі - адзіны сябра партыі БНФ у Барысаве, што вырашыў удзельнічаць у выбарах.
Цікава таксама, ці зарэгіструюць пенсіянерку Тамару Каважэнка, якая на працягу шматлікіх гадоў змагаецца з бяздзейнасцю ўладаў, не здольных вырашыць праблему падтаплення хат і падворкаў жыхароў Дымак.
Трое патэнцыйных кандыдатаў АГП ужо знялі свае кандыдатуры, падпарадкаваўшыся рашэнню партыйнага з'езду.
"Праваабаронцы за свабодныя выбары"
