Рашэнне па справе пра нерэгістрацыю “Нашай Вясны” Вярхоўны Суд агучыць заўтра
фота svaboda.org
11 жніўня ў Вярхоўным Судзе адбыўся працяг слуханняў па скарзе праваабаронцаў на адмову Мінюста ў рэгістрацыі ГПА “Наша Вясна”. Сваё рашэнне суд агучыць 12 жніўня ў 14.30.
Сёння падчас судовага паседжання прысутныя заслухалі выступ прадстаўніка Генеральнай пракуратуры спн. Кастаковай.
У сваім выступе пракурор адзначыла, што, на яе думку, Мінюст “меў рацыю пры адмове ў рэгістрацыі ГПА”. Але з усіх падставаў, прадстаўленых заснавальнікам аб’яднання рэгіструючым органам пры адмове, пракурор пагадзілася толькі з дзвюма.
Спн. Кастакова ва ўнісон Мінюсту адзначыла, што прадастаўлены для рэгістрацыі спіс заснавальнікаў аб’яднання “скажоны і ўтрымлівае недакладныя звесткі”. У якасці другой падставы пракурор назвала немагчымасць праверкі юрыдычнага адрасу ГПА.
Іншыя недахопы, названыя прадстаўніком Мінюста Аляксандрам Харытонам, пракурор Кастакова не назвала ў якасці падставаў для забароны на стварэнне легальнага праваабарончага аб’яднання.
