Чыноўнікі адмаўляюць «Барысаўскім навінам» у акрэдытацыі
Незалежнае выданне «Барысаўскія навіны» атрымалі адказ з райвыканкама на запыт аб акрэдытацыі.
«Барысаўскі раённы выканаўчы камітэт разгледзеў Ваш зварот і паведамляе, што акрэдытацыя журналістаў на сталай аснове пры Барысаўскім райвыканкаме не праводзіцца. На кожнае з мерапрыемстваў рэдакцыям СМІ высылаецца запрашэнне і ажыццяўляецца разавая акрэдытацыя. У сувязі з гэтым акрэдытацыя журналістаў Вашага выдання магчымая на агульных падставах па вышэйзгаданай схеме».
Гэта вытрымка з ліста в.а.старшыні Барысаўскага райвыканкама Юрыя Шылягіна, які днямі атрымала рэдакцыя недзяржаўнай газеты «Борисовские новости». (Пасланне датавана 16-м ліпеня).
Гэты адказ амаль даслоўна дублюе ліст, які некалькімі днямі раней прыйшоў у рэдакцыю з галоўнага ідэалагічнага ўпраўлення Мінаблвыканкама.
Каля месяца таму галоўны рэдактар выдання Анатоль Букас звярнуўся з просьбай акрэдытаваць сваіх журналістаў пры Барысаўскім райвыканкаме і Мінскім аблвыканкаме.
Па словах рэдактара, тая «схема» акрэдытацыі СМІ, якую апісваюць у сваіх лістах рённыя і абласныя чыноўнікі, не працуе.
«За 17 гадоў існавання газеты нам ніводнага разу не даслалі ніякіх запрашэнняў альбо прэс-рэлізаў. А калі нашы журналісты самі прыходзяць на афіцыйнае мерапрыемства, ім кажуць, што яны не акрэдытаваныя, і не пускаюць. Таму гэтыя лісты — проста адпіскі», — лічыць А. Букас.
